ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

http://www.trinity.eotc-churches.org/site/components/com_gk2_photoslide/images/thumbm/46016501.jpg http://www.trinity.eotc-churches.org/site/components/com_gk2_photoslide/images/thumbm/7472451.jpg http://www.trinity.eotc-churches.org/site/components/com_gk2_photoslide/images/thumbm/395795church_4.jpg http://www.trinity.eotc-churches.org/site/components/com_gk2_photoslide/images/thumbm/357816church_5.jpg
ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት የ2006 ዓ.ም የልደት በዓልን አስመልክተው መልእክት አስተላለፉ

0908

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳስት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት በእንተ ልደቱ ለእግዚእነ ወአምላክነ ወመድኃኒነ ኢየሱስ ክርስቶስ
በስመ አብ ወወልድ ወመንፈስ ቅዱስ አሐዱ አምላክ አሜን
-    በሀገራችን በኢትዮጵያ በገጠርና በከተማ የምትኖሩ፣
-    ከሀገር ውጭ በተለያዩ አህጉር የምትኖሩ፣
-    የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፣
-    በሕመም ምክንያት በየሆስፒታሉ ያላችሁ፣
-    እንዲሁም የህግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያት በሙሉ፣
 ወልድ ተብሎ ውሉድ እንድንባል ላበቃን ለጌታችን ለአምላካችንና ለመድኃኒታችን ለኢየሱስ ክርስቶስ በዓለ ልደት እንኳን በሰላም አደረሳችሁ!!
“ወናሁ ትፀንሲ ወትወልዲ ወልደ ወትሰምዩዮ ስሞ ኢየሱስ ዘውእቱ ያድኅኖሙ ለሕዝቡ እምኃፂአቶሙ፤ እነሆ ትፀንሻለሽ ወንድ ልጅንም ትወልጃለሽ፣ ሕዝቡን ከኃጢአታቸው ያድናቸዋልና”፣ ስሙንም ኢየሱስ ትይዋለሽ” (ሉቃ 1፡31፣ ማቴ. 1፡21)፡፡
ሁላችንም እንደምናውቀው ዘላለማዊና ቀዳማዊ የሆነ የእግዚአብሔር ልጅ ኢየሱስ ክርስቶስ፣ ሰው ሆኖ እንዲወለድ ምክንያት የሆነው፣ የሰው ኃጢአት ነው፡፡
    ሰው በኃጢአት ምክንያት ከእግዚአብሔር ተለይቶ ክብሩን ካጣ በኋላ፣ በነፍሱም ሆነ በሥጋው፣ ለአጠቃላይ ውድቀት ተዳረገ፤ ንፁሕ የነበረ ባህርዩ እንደ ሰኔና እንደ ሐምሌ ጎርፍ ደፈረሰ፤ የኃጢአት ድፍርሱም እየባሰና እየከፋ ከመሄድ በቀር፣ መሻሻል አላሳየም፣ ይሁንና የክብር አምላክ የሆነ እግዚአብሔር አምላካችን፣ ለክብር በክብር የፈጠረውን የሰው ልጅ፣ እንደ ወደቀ ሊቀር አልፈለገምና፣ የመዳኛ ዘዴ አበጀለት፡፡
አምላካችን እግዚአብሔር፣ ሰውን የማዳን ሥራው፡-
መቼ?በማን?የት?እንዴት እንደሚከናወን፣ አምስት ሺህ አምስት መቶ ዘመን ሙሉ በትንቢት፣ በምሳሌ፣ በራዕይና በቀመረ ሱባኤ፣ በቅዱሳን ነቢያቱ አማካኝነት፣ ለዓለም ሲገለጽ ቆየ፡፡
    በእርሱ የተያዘው ቀጠሮ ሲደርስ፣ በፊቱ የሚቆመውን መልአኩ ቅዱስ ገብርኤልን፣ ወደ ድንግል ማርያም ላከ፡፡ ቅዱስ ገብርኤልም ከእግዚአብሔር ንገር ተብሎ የተላከበትን መልእክት ይዞ፣ ወደ ድንግል ማርያም መጣ፤ እንዲህም አላት “እነሆ ትፀንሻለሽ፣ ወንድ ልጅንም ትወልጃለሽ፤ ሕዝቡን ከኃጢአታቸው ያድናቸዋልና፤ ስሙንም ኢየሱስ ትይዋለሽ፤ እርሱ የልዑል እግዚአብሔር ልጅ ይባላል፤ አላት”  ከዚህ አገላለጽ በመነሣት፣ ፍሬ ነገሩን ስናስተውል፤ ከቅድስት ድንግል ማርያም የሚወለደው ህጻን፡- ዕሩቅ ብእሲ (ተራ ሰው) ሳይሆን የእግዚአብሔር ልጅ እግዚአብሔር መሆኑን፣ የስሙ ትርጓሜም መድኃኒት ማለት መሆኑን፣ መድኃኒትነቱም ለሕዝቡ ሁሉ መሆኑን፣ ሕዝቡን የሚያድናቸውም ከኃጢአታቸው መሆኑን፣ በማያሻማ ሁኔታ ማወቅ ይቻላል፡፡
                             የተወደዳችሁ የመንፈስ ቅዱስ ልጆቼ ምእመናንና ምእመናት
የጌታችን መድኃኒትነት ድንበር የለሽና፣ በሁሉም በሽታዎች ላይ የሚሠራ ቢሆንም፣ በዋናነት ግን በትልቁ የኃጢአት በሽታ ላይ ያነጣጠረ መድኃኒት መሆኑን፣ በተጠቀሰው ኃይለ ቃል መረዳት ይቻላል፡፡ ምክንያቱም በዓለም ላይ የሚታየውን ክፉ በሽታ ሁሉ፣ ሰበብ በመሆን ጎትቶ ያመጣብን ይህ ኃጢአት ነውና፤ ጌታችን በዋናነት እርሱን ለመደምሰስ መምጣቱን ለማሳየት፣ ከኃጢአታቸው ያድናቸዋል ተብሎ በግልጽ ተለይቶ ተነገረ፤ በሽታው ትልቅ መሆኑን የምንረዳውም፣ ትልቅ ዋጋ ያለው መድኃኒት፤ ያውም የእግዚአብሔር ልጅን ያህል፤ ለመሥዋዕትነት ያስፈልገው በመሆኑ ነው፡፡
    ለመሆኑ የኃጢአት በሽታ የሚያስከትለው ጉዳት ምንድን ነው ? ያልን እንደሆነ፤ ሰውን ከእግዚአብሔር በማራቅና እግዚአብሔርን በማሳጣት፣ ሰውን ማዋረድ፣ ማጎሳቆልና መግደል ነው፡፡ ሰው እግዚአብሔርን ካጣ፣ ሁሉንም ያጣል፣ አዳም አባታችንና ሔዋን እናታችን ያጡትም ይህንን ታላቅ ሀብት ነበር፤ እግዚአብሔርን ሲያጡ፤ ሁሉንም አጡ፣ ኃጢአተኛ ማለት ያጣ፣ የነጣ ማለት ነው፤ ምንን ያጣ? እግዚአብሔርንና የእግዚአብሔር የሆነውን ሁሉ ያጣ ማለት ነው፤
ሰው ከእግዚአብሔር ከተለየ፡-  ሕይወት የለም፣ ሰላምም የለም፣ ክብርም የለም፣
በአጠቃላይ መልካም የሆነ ነገር ሁሉ የለም፣ ሊኖር የሚችለው ተቃራኒው ነው፤ እርሱም፡-
    ሞት፣ በሽታ፣ ድህነት፣ ጠብ፣ መለያየት፣ ውርደት የመሳሰለው ክፉ ነገር ሁሉ ነው ሊኖር የሚችለው፤
ከዚህ አንጻር ጌታችን ኢየሱስ ክርስቶስ፣ ሕዝቡን ከኃጢአታቸው ያድናቸዋል ሲባል፣ በዋነኛነት እግዚአብሔርንና የእግዚአብሔር የሆነውን ሁሉ ከማጣት ያድናቸዋል ማለት ነው፤
    ይህንም በራሱ መሥዋዕትነት፣ ሰውን ከእግዚአብሔር ጋር ስላስታረቀና ስላገናኘ፣ ድኅነታችንን በዚህ አረጋግጦልናል፤ ፈጽሞልናልም፤ (1 ቆሮ. 5፡19)፡፡
ዛሬ፣ እግዚአብሔርንና የእርሱ የሆነውን የምናጣበት የኃጢአት በሽታ፣ በጌታችን ተወግዷል፡፡
አሁን በፊታችን ቆሞ እየጠበቀን ያለው ኃጢአት ሳይሆን፣ በኢየሱስ ክርስቶስ የተገኘው ጽድቅ ነው፤
ጽድቁን ተከትሎ ደግሞ፣ እግዚአብሔርና የእርሱ የሆነው መልካመ ነገር ሁሉ ማለትም መንግሥተ ሰማያት፣ ዘላለማዊ ሕይወትና ዘላለማዊ ክብር፣ በፊታችን ቆመው እየጠበቁን ነው፤
እነኝህም፣ ጌታችን ዳግመኛ ወደዚህ ዓለም ሲመጣ፣ እውን የሚሆኑ ናቸው (1 ጴጥ. 1፡5-7)
                                      የተወደዳችሁ የመንፈስ ቅዱስ ልጆቼ ምእመናንና ምእመናት!!
ዛሬ፣ የጌታችን የኢየሱስ ክርስቶስን በዓለ ልደት በታላቅ ድምቀት የምናከብርበት ዋናው ምክንያት፣ በኃጢአታችን ምክንያት ያጣናቸውን እግዚአብሔርና የእርሱ ሀብታት ሁሉ፣ በእርሱ ፍጹም ምሕረትና ፍቅር፣ እንደገና ያገኘናቸው መሆናችን፣ በቤተልሔም በግልጽ የታየበት ዕለት ስለሆነ ነው፡፡
የጌታችን፣ ሥጋችንን ተዋሕዶ መገለጥ፣ የመላእክት የደስታ ዝማሬ፣ የእረኞችና የሰብአ ሰገል ተአምራዊ ጉዞ፣ የኅብረታችን መመለስን ይገልጻሉ፡፡
የእኛ አካል ሥጋና፣ የእርሱ አካለ መለኮት፣ በተዋህዶ አንድ አካል ሆኖ በቤተልሔም መወለዱ፣ ሰው አጥቶት የነበረውን የእግዚአብሔር ኅብረት ማግኘቱ ብቻ ሳይሆን፣ በአካል ቃል ርስትነት፣ አምላክ ለመሆን በመብቃቱ የኃጢአት ግንብ መደርመሱ እርግጥ ሆነ፣ የተፈለገው ትልቅና ወሳኝ መድኃኒትም ይሄ ነው፤ እግዚአብሔር ይህን ያህል ከወደደን፣ ማለትም ከመለኮት ጋር ለመዋሀድና፣ የመለኮት የሆነውን ሁሉ ባለቤት ለመሆን ካበቃን፣ ይህን ላደረገልን አምላክ ምን ውለታ መክፈል እንችላለን?
እርግጥ ነው ለአምላክ የሚሆን ውለታ ላይገኝ ይችላል፤ ነገር ግን፣ ለእርሱ ያለንን ፍቅር ለመግለጽ የሚያስችለን ተጨባጭ የሆነ ግብረ መልስ መስጠት፣ ከሁላችን ይጠበቃል፤ ይህ ለሰው ሁሉ የሚቻል ነው፡፡
እርሱ፣ ሥጋችንን ከአፈር አንስቶ፣ በተዋሕዶ የራሱ አካል እንዳደረገው፣ እኛም በድህነትና፣ በስደት ምክንያት በሰው ሀገር አሰቃቂ የሆነ እንግልት እየደረሰባቸው የሚገኙ ወጣት ልጆቻችን፣ አካላችን ናቸውና፣ ደግፈን በሁለት እግራቸው እንዲቆሙ ማድረግ ይጠበቅብናል፡፡
ከዚህ አኳያ መንግሥት ከፍ ያለ ገንዘብ በመመደብና አስፈላጊውን የዲፕሎማሲ ሥራ በመሥራት፣ በሰው ሀገር ለከፍተኛ ጉዳት ተጋልጠው የነበሩትን ዜጎች፣ በፍጥነት ወደ ሀገር እንዲመለሱ ያደረገው ተግባር፣ ቤተክርስቲያናችን በከፍተኛ አድናቆት ትመለከተዋለች፡፡
ለወደፊትም እንደዚህ የመሰለውን ወገንን የመታደግ ሥራ ለማከናወን መንግሥት በሚንቀሳቀስበት ሁሉ፣ ቤተክርስቲያናችን የበኩሏን ከማድረግ ወደኋላ እንደማትል በዚህ አጋጣሚ ታረጋግጣለች፡፡
ወጣት ልጆቻችንም፣ ተሰዳችሁ ዋስትና የሌለውን የባዕድ ሀገር ሀብት ከመቋመጥ ይልቅ፣ በሃይማኖታችሁና በሀገራችሁ ሆናችሁ፣ ሥራን ሳትንቁና ሳታማርጡ ሌት ከቀን ጠንክራችሁ ሥሩ፣ ጊዜያችሁን በሥራ ብቻ በማዋል አስተማማኝ ሀብት ማምጣት እንደምትችሉ አምናችሁ፣ ሀገራችሁን አልሙ፣ በሀገራችሁ ክብራችሁን ተደላድላችሁ፣ በክብር የምትኖሩበትን አስተሳሰብ መከተል፣ ቀዳሚ ምርጫችሁ ይሁን፤ እንደዚህ ያለውን ችግር ሁሉ በማስወገድ፣ ዘላቂና መሰረታዊ የሆነ መፍትሔ በሀገራችን ላይ ለማምጣት፡-
   በመንፈስ፣ በኢኮኖሞና በማህበራዊ አገልግሎት ያደገችና የበለፀገች ሀገር እውን ለማድረግ በሚደረገው ርብርቦሽ፣ ሁላችንም በመተባበርና በቀጥታ በመሳተፍ፣ የድህነት ቅነሳ መርሐ ግብሩን፣ በተፋጠነ ሁኔታ ማሳካት ይኖርብናል፡፡
በተለይም በዚህ የደስታና የኅብረት በዓል፣ የእግዚአብሔር ልጆችና ፍጡራን የሆኑ ወገኖቻችን፣ ምግበ ሥጋ እየሸተታቸው፣ በምግብ እጦት ምክንያት ጾም እንዳይውሉና፣ እግዚአብሔር እንዳያዝንብን፣ ከኛ ጋር በማዕዳችን እንዲከፈሉ ማድረግ አለብን፡፡
ለእግዚአብሔር ፍቅር የምንሰጠው ግብረ መልስ ይኸው ነው፤ እግዚአብሔርና ሕዝብ፣ ሕዝብና ሕዝብ፣ አንድ ላይ አገናኝቶ ለሠመረ ሀገራዊ ውጤት የሚያበቃንም እንደዚህ ያለ መተዛዘንና መደጋገፍ፣ መቻቻልና መስማማት፣ መተሳሰብና መከባበር ሲኖር እንደሆነ መዘንጋት የለብንም፡፡
በመሆኑም ሕዝበ ክርስቲያኑ በዓሉን ከተቸገሩ ወገኖቹ ጋር በአንድ ማዕድ እንዲያከብር፣ መልእክታችንን በእግዚአብሔር ስም እናስተላልፋለን፡፡
መልካም የልደት በዓል ያድርግልን፣
እግዚአብሔር ሁላችንንም ይባርከን ይቀድሰን!!
አሜን
አባ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀጳጳስ ዘአክሱም ወዕጨጌ ዘመንበረ ተ/ሃይማኖት
               ታህሳሰስ 29 ቀን 2006 ዓ.ም
                 አዲስ አበባ
                 ኢትዮጵያ

 
የመንበረ ጸባዖት ቅድስት ሥላሴ ካቴድራል አስተዳደር ጽ/ቤት በካቴድራሉ ግቢ ውጥ በአ/አ ሀ/ስብከት መዋቅራዊ አደረጃጀትና ዝርዝር የአሠራር ጥናት ላይ በመቃውሞ ድብቅ ስብሰባ ተካሂዷል ተብሉ የተዘገበውን በፅኑ ተቃወመ

pp002

የመንበረ ጸባዖት ቅድስት ሥላሴ ካቴድራል  አስደናቂ ከሚባሉ ታሪካዊ ቦታዎች አንዱ ነው፡፡ ካቴድራሉ በኢትዮጵያ ውስጥ ከሚገኙ አብያተ ክርስቲያናት መካከል ዓለም ዓቀፋዊ ይዘት ያለውና አንጋፋ ካቴድራል ሲሆን ከታሪካዊነቱም በተጨማሪ፡-
•    ዓለም አቀፋዊ የኃይማኖት ስብሰባዎች የሚካሄድበት፣
•    የፓትርያሪኮችና የብፁአን ለቃነ ጳጳሳት በዓለ ሲመት የሚከናወንበት፣
•    ብሔራዊ የመታሰቢያ በዓላትና ሥርዓተ ፀሎት የሚካሄድበት ነው፡፡
ከ6ቱ ቅዱሳን ፓትርያሪኮች መካከል 4ቱ የካቴድረሉ አገልጋዮችና የሥራ ኃላፊዎች የነበሩ ሲሆን ከግማሽ በላይ የሚሆኑ ብፁአን ሊቃነ ጳጳሳት የካትድራሉ አስተዳዳሪዎችና አገልጋዮች የነበሩ ናቸው ቢባል ማጋነን አይሆንም፡፡ይህም ካቴድራሉ ምን ያህል ትልቅ ቦታ እንደሆነና በቦታውም የሚመደቡ ሰዎች ምን ያህል ሊቃወንት እና የልማት አባቶች እንደሆኑ ግልፅ ነው ፡፡

ይሁንና ግን  የታላቁና የኢትዮጵያ ኦርቶዶክስ ተዋሂዶ ቤተ ክርስቲያን መኩሪያና መመከያ የሆነውን  ካቴድራል ስም ለማጥፋት December 14, 2013 ሐራ ዘተዋሕዶ በሚባል ብሎግ በመንበረ ጸባዖት ቅድስት ሥላሴ ካቴድራል አስተዳደር ጽ/ቤት በካቴድራሉ ግቢ ውጥ በአ/አ ሀ/ስብከት የመዋቅር፣ አደረጃጀትና ዝርዝር የአሠራር ጥናት ላይ በመቃውሞ ድብቅ ስብሰባ ተካሂዷል ተብሎ መዘገቡ እጀግ በጣም የሚያሳዝንና የሚያሳፍር ከእውነት የራቀ ውሸት መሆኑን የካትድራሉ አስተዳደር ጽ/ቤት አስታውቋል፡፡የብሎጉ አዘጋጆቹም ከእንዲህ አይነት ከእውነት የራቀ የአልቧልታ ሥራ እንዲታቀቡ በእግዚብሔር ስም ጠይቋል፡፡ካቴድራሉ አዲሱ የአዲስ አበባ ሀገረ ስብከት መዋቅራዊ አደረጃጀትና ዝርዝር የአሠራር ጥናት ከየትኛውም ደብር /ካቴድራል ቀድሞ ሀገረ ስብከቱ ለሚያስተዳድራቸው ገደማትና አድባራት በተለይም የመልካም አስተዳደር ችግር ላለባቸው አንዳንድ  ገደማትና አድባራት ትክክለኛና ወቅታዊ መሆኑን ቀድሞ የተረዳ መሆኑን ሊሰመርበት የሚገባ ጉዳይ ነው ብሏል፡፡   
አጠቃላይ የካቴድራሉ የአሠራር ሂደት አሁን በአዲስ አበባ ሀገረ ስብከት ከተዘጋጀው መዋቅራዊ አደረጃጀትና ዝርዝር የአሠራር ጥናት ቀደም ብሎ ከዓመታት በፊት በሥራ የተረጎመና አስከአሁንም ድረስ በዚሁ የአሠራር ሂደት እንደቀጠለ ነው፡፡ለዚሁም ነው ካቴድራሉ ልማታዊ ካቴድራል ሊሆን የቻለው፡፡በአሁኑ ሰዓት ካትድራሉ በተለምዶ 22 ተብሎ በሚጠራው አካባቢ በ47ሚሊዮን ዘመናዊ በለ5 ፎቅ ሁለ ገብ ህንፃ እያስገነባ ሲሆን እንደዚሁም በካቴድራሉ አከባቢ በ7,000,000 ሁለ ገብ የመቃብር ፎካ በመገንባት ላይ ነው፡፡

በመሆኑም ታሪካዊና ልማታዊ የሆነውን የካቴድራሉን ስሙን ለማጥፈት ብሎም የጀመረውን የልማት እንቅስቃሴ ለማደናቀፍ መሆኑን ሁሉም የቤተ ክርስቲኒቱ አባቶች፤ሊቃውንት፤አገልጋዮችና ምዕመናን እንዲገነዘቡልን እንፈልጋለን በማለት አሳስቧል፡፡

 
የመንበረ ጸባዖት ቅድስት ሥላሴ ካቴድራል ሰበካ ጉባኤ ጽ/ቤት ዘመናዊ ሁለ ገብ የመቃብር ፎካ ለመስራት የውል ስምምነት ተፈረመ

0050

የመንበረ ጸባዖት ቅድስት ሥላሴ ካቴድራል ሰበካ ጉባኤና ልማት ኮሚቴ ሊያሠራው ላቀደው ሁለ ገብ የመቃብር ፎካ ህንፃ መስከረም 12/2006 ዓ.ም በሪፖርተር ጋዜጣ ባወጣው ማስታወቂያ መሠረት ከ11 ያላነሱ ተጫራቾች/ተወዳዳሪዎች የቀረቡ ሲሆን የካቴድራሉ የቴክኒክ ኮሚቴው ያወጣውን መስፈርት አሟልተው ለውድድር የቀረቡት/ያለፉት ግን 3 ድርጅቶች ነበሩ፡፡እነሱም
1.    አንኮር ኮንስትራክሽን ደረጃ 4 ሲሆን ያቀረበው የገንዘብ መጠን 7,035,597.76
2.    አምባቸው አስገዶም  ኮንስትራክሽን ደረጃ 5 ሲሆን ያቀረበው የገንዘብ መጠን 7,162,287.20 እና
3.    ኤ.ቢ.ኤም. ኮንስትራክሽን ደረጃ 3 ሲሆን ያቀረበው የገንዘብ መጠን 7,024,235.18 ነው፡፡
በመሆኑም ሥረውን ከመጀመሪያው ጀምሮ ሲከታተሉ የቆዩት የሀገረ ስብከት ተወካዮች፤የካቴድራሉ ሰበካ ጉባኤና ልማት ኮሚቴ በጋራ በመሆን ተወዳዳሪዎቹ ያቀረቧቸውን ዶክሜንቶች፤ደረጃና የገንዘብ መጠን በካቴድራሉ  ባለሞያዎች  ቴክኒክ ኮሜቴ ተሠርቶ ከቀረበ በኋላ ኤ.ቢ.ኤም. አንኮር ኮንስትራክሽን ከቀረቡት ተወዳዳሪዎች መካከል ከሁሉም የተሻለ ደረጃ ያለውና ያቀረበው የገንዘብ መጠንም ከሁሉም ያነሰ በመሆኑ  ኤ.ቢ.ኤም ኮንስትራክሽንን አሸናፊ አድርጎ መርጦታል፡፡በመሆኑም ህዳር 20/2006 ዓ.ም ይህን አስመልክቶ የውል ስምምነቱ ላይ  የሀገረ ስብከት ተወካዮች፤የካቴድራሉ ሰበካ ጉባኤና ልማት ኮሚቴ እንዲሁም የኤ.ቢ.ኤም. ኮንስትራክሽን ተወካይ በተገኙበት የውል ስምምነቱ ተፈርሟል፡፡

ሥራው በ3 ወር ጊዜ ውስጥ ሙሉ በሙሉ የሚያልቅ ሲሆን ከፎካው ጋር ተያያዥ ያላቸው ሥራዎች ከላይ በተጠቀሰው የገንዘብ መጠን በአጭር ጊዜ ውስጥ እንዲጠናቀቅ ይደረጋል፡፡ ኤ.ቢ.ኤም.  ኮንስትራክሽን ከ7,024,235.18  ብር ላይ 24,235.18 ብር በመቀነስ በ7,000,000 ብር ብቻ እንደሚሠራ ተስምምቷል የውሉ አካል እንዲሆንም ተደርጓል፡፡

የዕለቱ መርሃ ግብርም በክቡር ቆሞስ ሊቀ ሥልጣናት አባ ኪሮስ ፀጋዬ የካቴድራሉ ዋና አስዳዳሪ በፀሎት ተዘግቷል፡፡

 
እንኳን ለሊቀ መላእክት ለቅዱስ ሚካኤል ክብረ በዓለ በሰላም አደረሰን አደሳችሁ!

0337

በዚህች ቀን የሰማይ ሰራዊት ሁሉ አለቃቸው መልአከ ምክሩ የምክሩ አበጋዝ ይለዋል የቅድስት ሥላሴ መንጦላእትን የሚከፍትና የሚዘጋ ለፍጥረት ሁሉ የሚማልድ  ታላቁ  መልአክ ቅዱስ ሚካኤል የተሾመበት ቀን ነው። በህዳር ወር በዐሥራ ሁለተኛው ቀን ቤተ ክርስቲያናችን የታላቁ መልአክ የቅዱስ ሚካኤልን በዓለ ሲመት በታላቅ ምቀት ታከብረዋለች፡፡ እንደ ቅዱሳን አባቶቻችን አስተምህሮ ህዳር 12 ቀን ታላቁ መልአክ ቅዱስ ሚካኤል በኢዮር ባለችው በአራተኛይቷ ከተማ በሚኖሩት ኃይላት እና በአሥሩ ነገደ መላእክት ላይ አለቃ ሆኖ የተሾመበት ቀን ነው፡፡እግዚአብሔር ሳጥናኤልን በትዕቢቱ ምክንያት ከሥልጣኑ ገፍፎ ወደ ምድር ሲጥለው ቅዱስ ሚካኤል በእርሱ ቦታ በዐሥሩ ከተማ በመቶውም ነገደ መላእክት ላይ ተሹሟል፡፡(ይህን ሁለተኛውን ሹመት ያገኘው በሚያዚያ 2 እንደሆነ አክሲማሮስ በሚባለው የቤተክርስቲያናችን መጽሐፍ ላይ ሰፍሮ አናገኛለን፡፡)
የቅዱስ ሚካኤል ሹመት በነገደ መላእክት ላይ ብቻ ግን አይደለም ነገር ግን የእግዚአብሔር ሕዝብ በሆኑት ላይም ጭምር ነው ፡፡ ይህም እንደሆነ እንድንረዳ በብሉይ ኪዳን የእግዚአብሔር ሕዝብ የተባለውን እስራኤል ዘሥጋን ሲራዳና ሲጠብቅ እንደነበረ ተጽፎልን እናገኛለን፡፡ ለምሳሌ መጽሐፍ ቅዱስ መልአኩ ቅዱስ ሚካኤል ለኢያሱ በኢያሪኮ ምድረ በዳ እንደተገለጠለት “… ዐይኑን አንሥቶ ተመለከተ እነሆም የተመዘዘ ሰይፍ የያዘ ሰው በፊቱ ቆመ፤ ኢያሱም ወደ እርሱ ቀርቦከእኛ ወገን ወይስ ከጠላቶቻችን ወገን ነህ? አለው፡፡ እርሱምእኔ የእግዚአብሔር ሠራዊት አለቃ ሆኜ አሁንም ወደ አንተ መጥቼአለሁ” (ኢያ.513) ይለናል፡፡ ቅዱስ ዮሐንስ ስለ ቅዱስ ሚካኤል እንዲህ አለ "በሰማይም ሰልፍ ሆነ፤ ሚካኤልና መላእክቱም ዘንዶውን ተዋጉት፥ ዘንዶውም አልቻላቸውም፥ ከዚያም በኋላ በሰማይ ቦታ አልተገኘለትም። ራእ 127 ነብዩ ዳንኤልም እንዲህ አለ "በዚያም ዘመን ስለ ሕዝብህ ልጆች የሚቆመው ታላቁ አለቃ ሚካኤል ይነሣል" ዳን ፲፪፥፩።


ጌታችን መድኃኒታችን ኢየሱስ ክርስቶስም ቅዱሳን መላእክት እኛን እንደሚጠብቁና እንደሚራዱ እንዲሁም ስለእኛ በፊቱ አንደሚቆሙ ሲያስተምረንከእነዚህ ከታናናሾቹ አንዱን ስንኳ እንዳትንቁ ተጠንቀቁ፤ መላእክቶቻቸው በሰማያት ሁል ጊዜ በሰማይ ያለውን የአባቴን ፊት ያያሉ እላችኋለሁ” (ማቴ.1810) ብሎናል፡፡ እኛን ይጠብቁ ዘንድ የተሰጡን ቅዱሳን መላእክት

ዝርዝር ንባብ...
 
የ2006 ዓ.ም የቅዱስ ሲኖዶስ ምልዐተ ጉባኤ ልዩ ልዩ ውሳኔዎችን በማሳለፍ አጠናቀቀ

2021

ጉባኤው ከጥቅምት 11 ቀን 2006 ዓ.ም. ጀምሮ ላለፉት 10 ቀናት ተወያይቶ ያሳለፋቸውን ውሳኔዎች አስመልክቶ ጥቅምት21/2006 ዓ.ም ከሰዓት በኋላ የቅዱስ ሲኖዶስ አባላት በተገኙበት በብፁዕ ወቅዱስ ፓትርያርኩ ጋዜጣዊ መግለጫ ተሰጥቷል፡፡ የመግለጫውን ሙሉ ቃል እንደሚከተለው ይቀርባል፡፡ ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ በስመ አብ ወወልድ ወመንፈስ ቅዱስ አሐዱ አምላክ አሜን የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ጉባኤ፤ በዓመት ሁለት ጊዜያት እንዲሆን በፍትሕ መንፈሳዊ አንቀጽ 5 ቁጥር 164 በተደነገገው መሠረት የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የመክፈቻው ሥርዓተ ጸሎት ከተፈጸመበት ከጥቅምት 11 ቀን 2006 ዓ.ም. ጀምሮ እስከ ጥቅምት 21 ቀን 2006 ዓ.ም. ድረስ የተለመደውን ዓመታዊ መደበኛ ስብሰባን በማካሔድ፤ - ለቤተ ክርስቲያናችንና ለኅብረተሰቡ የሚጠቅመውን፤ - ለሀገርና ለዓለም ሰላም የሚበጀውን አጀንዳ በማመቻቸት በስፋትና በጥልቀት ተወያይቶ የሚከተለውን ውሳኔ አሳልፏል፤

1. የ32ኛው አጠቃላይ ሰበካ መንፈሳዊ ጉባኤ ውሳኔና የጋራ መግለጫ በምልዓተ ጉባኤ የ2006 ዓ.ም. የሥራ መመሪያ እንዲሆን ጸድቋል፤ 2. ከአጥቢያ ቤተ ክርስቲያን እስከ አዲስ አበባ ሀገረ ስብከት ጽ/ቤት ድረስ በባለሙያዎች ተጠንቶ የቀረበውና በስላይድ የታየው የሥራ መዋቅር ወደታች ወርዶ በካህናት፣ በምእመናንና በሰንበት ትምህር ቤት ወጣቶች በውይይት ዳብሮ በሚገባ ተጠንቶና ተስተካክሎ ለቋሚ ሲኖዶስ እንዲቀርብና ቋሚ ሲኖዶሱም ዓይቶና ተመልክቶ በሥራ ላይ እንዲያውል ምልዓተ ጉባኤው ወስኗል፤

3. ቅድስት ቤተ ክርስቲያናችን በልማት ዘርፍ ዙሪያ የምታደርገው እንቅስቃሴ በማዕከልም ሆነ በየአህጉረ ስብከቱ በበለጠ ተጠናክሮ እንዲቀጥል ምልዓተ ጉባኤው ተስማምቷል፤

4. - የአብነት ትምህርት ቤቶችንና የካህናት ማሠልጠኛ ማዕከላትን፤ - በጥንታዊነታቸውና በታሪክ መዘክርነታቸው ዕውቅና ያላቸውን ገዳማት፤ - ወላጅ አልባ ዕጓለማውታ ሕፃናት እየተማሩ የሚያድጉበትንና ሴቶች መነኰሳይያት በምናኔ የሚኖሩባቸውን ገዳማት በበለጠ እንዲጠናከሩ ማድረግ የታመነበት ስለሆነ፤ ለዚሁ አገልግሎት የሚውል በጀት በቤተ ክርስቲያኒቱ ማዕከላዊ አስተዳደር ተጠንቶ ይቀርብ ዘንድ ቅዱስ ሲኖዶስ ቀደም ሲል መመሪያን ሰጥቷል፤ አሁንም በድጋሜ መመሪያውን አጽንጥቷል፤

5. የዓለምን ሰላም፤ ፍቅር አንድነትን ጠብቆ መገኘት የሁሉም ዜጎች ኃላፊነት ስለሆነ ሁሉም ኅብረተሰብ አንድነትን ፈጥሮ አሁን በሀገራችን እየታየ ያለውን አክራሪነትና ጽንፈኝነትን በመቃወም ሰላምን የማስፈን ግዴታውን እንዲወጣ ቤተ ክርስቲያናችን ጥሪዋን ታስተላልፋለች፤

6. ከሀገራችን ውጭ ወደ ውጭው ዓለም ሕጋዊ ባልሆነ መንገድ የሚደረገው ፍልሰት የዜጎችን ሕይወት እየቀጠፈ በሀገርም ላይ ከፍተኛ ቀውስ እያስከተለ መሆኑ ስለሚታወቅ የችግሩን አስከፊነት ኅብረተሰቡ እንዲያውቀው በቤተ ክርስቲያናችን አስፈላጊው ትምህርት እንዲሰጥ ጉባኤው መመሪያ ሰጥቷል፤

7. የእናቶችና የዕጓለማውታ ሕፃናት፣ የአረጋውያንና የአረጋውያት፤ የሁሎችም ፍላጎት ተሟልቶ መኖር ይቻል ዘንድ ኅብረተሰቡ ትኩረት እንዲያደርግ ቅዱስ ሲኖዶስ ያሳስባል፤

8. ሀገራችን ኢትዮጵያ ከኤች አይ ቪ ኤድስ በሽታ፣ ከድንቁርና፣ ከድኅነትና ኋላ ቀርነት ተላቃ ዓለም ወደ ደረሰበት መድረስ የምትችለው ማንኛውም ወገን ተቻችሎና ተከባብሮ ለሰላምና ለልማት ሥራ ሲነሣሣ ስለሆነ፤ ይኸው ታውቆ ሁሉም የየበኩሉን ድርሻ እንዲወጣ ቅዱስ ሲኖዶስ ጥሪውን ያስተላልፋል፡፡

9. የኢትዮጵያ ኦርቶዶክስ ተዋሕዶ ቤተ ክርስቲያን በርካታ የሥነ ጽሑፍ፣ የሥነ ጥበብ፣ ሥነ ሥዕልና ኪነ ጥበብ ቅርሶችና ሀብቶች ባለቤት መሆንዋ የታወቀ ስለሆነ፤ የእነዚህ የቤተ ክርስቲያኒቱ የዜማ መጻሕፍት፣ የትርጓሜ መጻሕፍት፣ የሕንፃዎች፣ የቋንቋ በአጠቃላይም ብሔራዊው የአእምሮ ንብረት ባለቤትነት መብቷ በሕግ ይከበር ዘንድ በቅርስ ጥበቃና ምዝገባ በቤተ መጻሕፍት ወመዘክር መምሪያ ተከታታይነት ጉዳዩ ለሚመለከተው የፍትሕ አካል ቀርቦ ውሳኔን እንዲያገኝ፤

10. የብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት የሲመተ ፓትርያርክነት በዐል እንደ ቀደሙት ቅዱሳን ፓትርያርኮች የተሾሙበት ዕለት በየዓመቱ የካቲት 24 ቀን እንዲከበር የቅዱስ ሲኖዶስ ምልዓተ ጉባኤ ወስኗል፤

11. ስለ ኢትዮጵያ ኦርቶዶክስ ተዋሕዶ ቤተ ክርስቲያን ታሪካዊነትና ቀዳሚነት ሁሉም ሰው መጻፍ ሲገባው ዕውነት ያልሆነውን በማስመሰል የሚነገረውን፣ የሚጻፈውን ዕውነታውንና ትክክለኛውን አስተካክሎ ለሕዝብ ለትውልደ ትውልድ ማስተላለፍ እንዲቻል መነሻ ይሆን ዘንድ በብፁዓን አበው ሊቃነ ጳጳሳት የኮሚቴ አባልነት ተጠንቶ የቀረበውን ጽሑፍ ምልዓተ ጉባኤው በንባብ ሰምቶ ጉዳዩ ወደ ሊቃውንት ጉባኤ ቀርቦ የሊቃውንት ጉባኤውም ስለ ኢትዮጵያ ጥንታዊነትና ታሪካዊነት አብራርቶ፣ አስፍቶና አጉልቶ ለ2006 ዓ.ም. ለርክበ ካህናት ጉባኤ እንዲያቀርብ ወስኗል፤

12. የቅድስት ሥላሴ መንፈሳዊ ኰሌጅ፣ የቅዱስ ፍሬምናጦስ አባ ሰላማ ከሳቴ ብርሃን መንፈሳዊ ኰሌጅ፣ የሰዋሰወ ብርሃን ቅዱስ ጳውሎስ መንፈሳዊ ኰሌጅ የሦስቱም የቤተ ክርስቲያኒቱ መንፈሳውያን ኰሌጆች በጀታቸው ተጠቃሎ ወደጠቅላይ ቤተ ክህነቱ ገቢ እየሆነ በጀታቸውንም ጠቅላይ ቤተ ክህነቱ እየበጀተ እንዲከፍል ጉባኤው በሙሉ ድምፅ ወስኗል፤ ከዚህም ጋር በቅድስት ሥላሴ መንፈሳዊ ኰሌጅ ሥር የሚተዳደረው ከኰሌጁ ጋር ተያይዞ የሚገኘው አዲሱ ትልቁ ሕንፃ በጠቅላይ ቤተ ክህነት ቤቶችና ሕንፃዎች፤ አስተዳደርና ልማት ድርጅት ሥር ሁኖ የሕንፃዎቹ ወርኃዊ የኪራይ ገቢም በሕጋዊ መንገድ እንዲሰበሰብ ቅዱስ ሲኖዶስ ወስኗል፤

13. የቤቶችና ሕንፃዎች አስተዳደር ድርጅትን በተመለከተ በሚፈርሱ ቤቶች ምትክ ቸል ሳይባል በትጋትና በንቃት የመልሶ ማልማቱ የሕንፃ ግንባታን ለማካሔድ የሚያግዝ ገንዘብ ማግኘት እንዲቻል ለየአህጉረ ስብከት፣ ለአጥቢያ አብያተ ክርስቲያናትና በጠቅላይ ቤተ ክህነት ሥር ላሉ የልማት ድርጅቶች የአክስዮን ሽያጭ እንዲደረግ ተወስኗል፤

14. ቤተ ክርስቲያኒቱ በሥሯ ያሉ ምእመናኖቿን በትክክል ቆጥራ መመዝገብ እንድትችል በሰበካ ጉባኤ ማደራጃ መምሪያ በኩል ቅጽ ተዘጋጅቶ በየአንዳንዱ ሀገረ ስብከት ኃላፊነት ቆጠራው በየአህጉረ ስብከቱ እንዲካሔድ ተወስኗል፤

15. ስለ ሰንበት ት/ቤቶች ውስጠ ደንብ ተጠንቶ የቀረበው መመሪያ ጸድቆ በሥራ ላይ እንዲውል ተወስኗል፤

16. በጉጂ ዞን ነገሌ ቦረናና የሲዳማ ዞን አህጉረ ስብከትን በተመለከተ በሁለት ተከፍለው ያለመግባባት ችግር ፈጥረዋል በሚል የተነሣው ሁከት ዓመታትን ካስቆጠረ በኋላ ችግሩን የፈጠሩት የሁለቱም ወገኖች ጉዳዩ በዕርቅ እንዲፈጸም ጥያቄ በማቅረባቸው የቅዱስ ሲኖዶስ ምልዓተ ጉባኤ የዕርቀ ሰላሙን ሒደት የተቀበለ በመሆኑ እቦታው ላይ ተገኝተው ዕርቀ ሰላሙን የሚያወርዱ ብፁዓን አባቶችን ሰይሟል፤ ሀ. ብፁዕ አቡነ ማትያስ የካናዳ ሀገረ ስብከት ሊቀ ጳጳስ፤ ለ. ብፁዕ አቡነ እስጢፋኖስ በአዲስ አበባ ሀገረ ስብከት የብፁዕ ወቅዱስ ፓትርያርክ ረዳትና የጅማ ሀገረ ስብከት ሊቀ ጳጳስ ሐ. ብፁዕ አቡነ ሉቃስ የቅዱስ ሲኖዶስ ዋና ጸሐፊና በክልል ትግራይ የምዕራብ ሰቲት ሑመራ ሀገረ ስብከት ሊቀ ጳጳስ በመሆን ስምምነቱንና ዕርቀ ሰላሙን አስፈጽመው የመጨረሻ የዕርቁን ሠነድ ለጉባኤው እንዲያቀርቡ ተወስኗል፤

17. የጣና ቂርቆስ ገዳም አንጡራ ሀብት የሆነው መስቀለ ያሬድ ተሠርቆ ወደ ውጭ ተወስዶ ከቆየ በኋላ ወደሀገሩ ተመልሶ በመንበረ ፓትርያርክ ቤተ መጻሕፍት ወመዘክር ስለሚገኝ ገዳሙ መስቀሉ እንዲሰጠው በጽሑፍ በመጠየቁ ምልዓተ ጉባኤው እንዲሰጥ ወስኗል፤

18. የብፁዕ ወቅዱስ አቡነ ጳውሎስ ቀዳማዊ ፓትርያርክ ልዩ ልዩ ፎቶ ግራፎች፣ መጻሕፍትና የተለያዩ ንዋያተ ቅድሳትና አልባሳት የመሳሰሉትን በተመለከተ ቋሚ ሲኖዶስ ኃላፊነት ወስዶ ኑዛዜም ካለ ሁሉንም እየመረመረና እያጣራ ለየሚመለከታቸው እንዲሰጥ ይደረግ ዘንድ ምልዓተ ጉባኤው ወስኗል፤

19. ቤተ ክርስቲያናችን ወደፊት የምታከናውነውን ማኅበራዊና መንፈሳዊ አገልግሎት በዕቅድ የሚመራ እንዲሆን ለማስቻል በግንቦቱ ርክበ ካህናት ጉባኤ 2005 ዓ.ም. ተቋቁሞ የነበረው ኮሚቴ ያዘጋጀውን ጥናት ለጉባኤው አቅርቦ ጉባኤው ማብራሪያውን ካዳመጠ በኋላ ኰሚቴው ያላለቁ ሥራዎችን እንዲቀጥል በማለት መመሪያን ሰጥቷል ፡፡

20. በጥንታዊቷ፣ በታሪካዊቷ በርዕሰ አድባራት ወገዳማት አኵስም ጽዮን ቤተ ክርስቲያን አውደ ምሕረት በመሠራት ላይ ያለው ቤተ መጻሕፍት ወመዘክሩ ግንባታን አስመልክቶ ከዓቢይ ኮሚቴው በቀረበው ሪፖርት ላይ በመነጋገር በቀጣይ የገቢ ማሰባሰቢያ ስልቶችን ያስቀመጠ ከመሆኑም በላይ ለጊዜው ለተቋራጩ ብር 5,000,000 (አምስት ሚሊዮን ብር) እንዲሰጠውና የቆመው የግንባታ ሥራ እንዲቀጥል ወስኗል፤

21. በቅዱስ ሲኖዶስ ውሳኔ ተጠንቶ እንዲቀርብ ስለታዘዘው የማኅበረ ቅዱሳን ደንብ ደንቡን እንዲያጠና የተመደበው ኮሚቴ ጥናቱ ለጊዜው ያልደረሰለት መሆኑን ስለገለፀ ለግንቦት ርክበ ካህናት 2006 ዓ.ም. ጥናቱ ተጠናቆ ለቅዱስ ሲኖዶስ ምልዓተ ጉባኤ እንዲቀርብ ጉባኤው ትእዛዝ ሰጥቷል፤

22. የቅድስት ሥላሴ መንፈሳዊ ኰሌጅን በተመለከተ ኰሌጁን ማጠናከር አስፈላጊ ሆኖ በመገኘቱ ለኰሌጁ ዋና ዲን እንዲሾም ጉባኤው ውሳኔን አሳልፏል፤

23. ገዳማቱን መልሶ ማቋቋምና ማጠናከር ብሎም በነበሩበት ሁኔታ አደራጅቶ ሥራቸውን መቀጠል ይችሉ ዘንድ የሚያመለክት በመምሪያው በኩል ሰፊ ጥናት የተደረገ በመሆኑ ገዳማቱ የሚገኙትም በየአህጉረ ስብከቱ ስለሆነና ብፁዓን አበው የሌሉበት ጥናትም አጥጋቢ ውጤት ስለማይኖረው የተወሰኑ ብፁዓን ሊቃነ ጳጳሳት ከመምሪያው ተጠሪ ጋር ተገናኝተው ገዳማቱ እንዴት መቋቋምና መልማት እንዳለባቸው ጥናት ይደረግበት በሚለው ጉባኤው ተስማምቶ ጠለቅ ያለ ሀሳብ ከነመፍትሔው አጥንተው ለግንቦቱ 2006 ዓ.ም. ርክበ ካህናት ዓመታዊ ጉባኤ እንዲያቀርቡ፤ 1. ብፁዕ አቡነ ኤጲፋንዮስ የምዕራብ ሸዋ ሀገረ ስብከት ሊቀ ጳጳስን 2. ብፁዕ አቡነ ሳሙኤል የልማትና ክርስቲያናዊ ተራድኦ ኮሚሽን ሊቀ ጳጳስና የሕንፃዎችና ቤቶች አስተዳደር ድርጅት የበላይ ኃላፊን 3. ብፁዕ አቡነ ቀሌምንጦስ የከምባታ ሐዲያና ጉራጌ አህጉረ ስብከት ሊቀ ጳጳስን በመምረጥ ምልዓተ ጉባኤው በሙሉ ድምፅ ተስማምቶ ወስኖአል፡፡

24. የመንበረ ጸባዖት ቅድስት ሥላሴ ካቴድራል ሕንፃ ከጊዜ ብዛት የተነሣ ውሀ በማስገባቱ እድሳት የሚያስፈልገው ስለሆነ የእድሳቱም ጥናት በመቅረቡ የካቴድራሉ ሕንፃ የቅድስት ቤተ ክርስቲያናችንና የሀገር ቅርስ እንዲሁም የቱሪስቶች መዳረሻ በመሆኑ የውስጥና የውጭ ቁመናውን እንደያዘ በጥንቃቄ እድሳቱ እንዲደርግ ጉባኤው ወስኗል፤

25. በውጭ ሀገር ከሚገኙ የቤተ ክርስቲያን አባቶች ጋር ተጀምሮ የነበረው ዕርቀ ሰላም ወደፊት እንዲቀጥልና የቤተ ክርስቲያኒቱ አንድነት እንዲጠናከር ጉባኤ ተስማምቷል፤

26. በውጭው ዓለም ገለልተኛ አብያተ ክርስቲያናት ነን በሚል የሚገኙ ወገኖች ወደ እናት ቤተ ክርስቲያናቸው እንዲመለሱ የቅዱስ ሲኖዶስ ምልዓተ ጉባኤ ጥሪውን አቅርቧል፤

27. የኢትዮጵያ ኦርቶዶክስ ተዋሕዶ ቤተ ክርስቲያን ጥንታዊትና ታሪካዊት እንደመሆኗ ሁሉ በቀጣይም አጠቃላይ ማኅበራዊም ሆነ መንፈሳዊ ሥራዎቿን በመሪ ዕቅድ በመምራት ሙስናና የመልካም አስተዳደር እጦትም ከሥሩ መቅረፍ እንዲቻል በባለሙያዎች የተጠናውን የመሪ ዕቅድ ዘገባ በመገምገም በቀጣይ ዕቅዱ ዳብሮ በሥራ መተርጎም በሚቻልበት ሁኔታ ተዘጋጅቶ እንዲቀርብ ጉባኤው መመሪያ ሰጥቷል፤

28. አሁን ያለው ሕገ ቤተ ክርስቲያን ተሻሽሎ እንዲቀርብ በተወሰነው መሠረት የተሻሻለው ረቂቅ ሕገ ቤተ ክርስቲያን የቅዱስ ሲኖዶስ አባላት እንዲመለከቱት ረቂቁ የታደለ ሲሆን እንዲሁም በሚመለከታቸው ባለድርሻ አካላት ታይቶና ሐሳብ ተሰጥቶበት በ2006 ዓ.ም. ግንቦት ርክበ ካህናት ውይይት እንዲካሔድበት ምልዓተ ጉባኤው ተስማምቷል፤ ቅዱስ ሲኖዶስ ከላይ በተገለፁትና በሌሎችም መንፈሳውያንና ማኅበራውያን ጉዳዮች ላይ ለዐሥር ቀናት ያህል ሲወያይ ሰንብቶ አስፈላጊውን በመወሰን መደበኛ ስብሰባውን በዛሬው ዕለት በጸሎት አጠናቋል፡፡

ቸሩ እግዚአብሔር አምላካችን ለሀገራችን፣ ለሕዝባችን፣ ለዓለሙ ሁሉ ሰላሙን፣ ምሕረቱንና ፍቅር አንድነቱን ይስጥልን ፡፡

እግዚአብሔር አምላካችን ይባርከን፤ ይቀድሰን፤ አሜን ፡፡

አባ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት ጥቅምት 21 ቀን 2006 ዓ.ም.

 
ዝርዝር ፅሁፍ...
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 10 ከ 21

የቤተክርስቲያን አድራሻ

የካቴድራሉ ሰበካ ጉባዔ ጽ/ቤት
ስልክ ፤ 011-1-23-35-18 / 011-1-23-35-15
አዲስ አበባ
ኢትዮጵያ
church@trinity.eotc.org.et
www.trinity.eotc.org.et

ግጻዌ

ማስታወቂያ

ለመንበረ ጸባዖት ቅድስት ሥላሴ ካቴድራል እድሳት የበኩልዎን አስታዋጽዖ ያድርጉ!

መርዳት የምትፈልጉ ምዕመናን ሁሉ የሚከተለውን አድራሻ መጠቀም ትችላላችሁ፡፡

አራት ኪሎ ቅርንጫፍ, ቁጥር= 0171859072600/2637 (መንበረ ጸባዖት ቅድስት ሥላሴ ካቴድራል እድሳት )

ብላች መላክ ትችላላችሁ፡፡