ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

http://www.trinity.eotc-churches.org/site/components/com_gk2_photoslide/images/thumbm/46016501.jpg http://www.trinity.eotc-churches.org/site/components/com_gk2_photoslide/images/thumbm/7472451.jpg http://www.trinity.eotc-churches.org/site/components/com_gk2_photoslide/images/thumbm/395795church_4.jpg http://www.trinity.eotc-churches.org/site/components/com_gk2_photoslide/images/thumbm/357816church_5.jpg
ብፁዕ ወቅዱስ አቡነ ማቲያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳ ዘአክሱም ወእጨጌ ዘመንበረ ተክለሃይማኖት የ2006 ዓ.ም.የትንሣኤ በዓልን አስመልክቶው ቃለ ምዕዳን አስተላለፉ

0908

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት
በእንተ ትንሣኤሁ ለእግዚእነ ወአምላክነ ወመድኃኒነ ኢየሱስ ክርስቶስ
በስመ አብ ወወልድ ወመንፈስ ቅዱስ አሐዱ አምላክ አሜን
•    በሀገራችን በኢትዮጵያ በገጠርና በከተማ የምትኖሩ፣
•    ከሀገር ውጭ በተለያዩ አህጉር የምኖሩ፣
•    የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፣
•    በሕመም ምክንያት በየሆስፒታሉ ያላችሁ፣
•    እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት በሙሉ፤
እርሱ ሕያው ሆኖ ሕያዋን መሆናችንን በትንሣኤው ላበሠረን ለጌታችን  ለአምላካችንና ለመድኃኒታችን ለኢየሱስ ክርስቶስ በዓለ ትንሣኤ እንኳን በሰላም አደረሳችሁ!!
‹‹ወርኢናሃ ለሕይወት፤ ወተዐውቀት ለነ፤
ሕይወትን አየናት፣አወቅናትም›› (1ዮሐ1÷2)
የሕይወት መገኛና ምንጭ አምላካችን እግዚአብሔር ነው፣ ከእግዚአብሔር የተገኘው ሕይወት የሰው ልጅ የዕውቀት ብርሃን ነው፤ አምላካዊ ሕይወት ካለው ሰው የሚፈልቅ ብርሃናዊ ዕውቀት ጽልመታዊውን ዓለም በብሩህነቱ ያሸንፋል እንጂ በጽልመታዊ ዓለም አይሸነፍም፡፡ (ዮሐ.1÷4-5)
    የሰው ልጅ ሕያው አምላክ በመልኩና በአምሳሉ የፈጠረው ፍጡር በመሆኑ  ሕያውና ክቡር፣ ዘላለማዊና ብርሃናዊ፣ የማሰብ፣ የማመዛዘን፣ የመምረጥና፣ የመወሰን ነጻነት ያለውና ከሌሎች ፍጥረታት ሁሉ የላቀ አእምሮ ያለው ልዑል ፍጡር ነው፤
    ሰው ከእግዚአብሔር በተሰጠው ነጻነትና አእምሮ መሠረት ነጻነቱን ተጠቅሞ የመረጠውን የማድረግ ነጻነት ያለው ፍጡር ቢሆንም በነጻ ዕውቀቱና ምርጫው ለሚፈጽመው ሁሉ እርሱ  ራሱ ኃላፊነቱን ይወስዳል፤
ይህም ማለት በምርጫው መሠረት የሚሠራው ሥራ ሁሉ በእውነተኛው ዳኛ በእግዚአብሔር ፊት መልካም ሆኖ ከተገኘ ምስጋናን፣ መልካም ሆኖ ካልተገኘ ግን ተጠያቂነትንና ፍርድን ያስከትልበታል ማለት ነው፡፡
ከዚህ አንጻር የመጀመሪያ ሰው የሆነው አዳም ማድረግ ያለበትንና ማድረግ የሌለበትን ተለይቶ ከእግዚአብሒር ቢነገረውም የተነገረውን ሕግ ወደጎን ገሸሽ በማድረግ የራሱን ነጻ ምርጫ ተጠቅሞ ‹‹አትብላ›› የተባለውን በላ፤
በመሆኑም ይህ ድርጊት በእግዚአብሔር ዘንድ እጅግ ታላቅ ስሕተትና ድፍረት  ነበረና ተጠያቂነትን አስከተለ፣ በመጨረሻም ሕይወትን የሚያሳጣ የሞት ፍርድንና ቅጣትን በራሱና በልጆቹ ሁሉ ላይ አመጣ፡፡
ፍርዱ ሥራ ላይ ከዋለበት ቀን ጀምሮ ሰው ሕይወቱን አጣ ማለትም ከእግዚአብሔር አንድነት ተለየ፤ ሞትና ሲኦልም ሰውን ከእግዚአብሔር ለይተውና የራሳቸው ተገዥ አድርገው እስከ ስቅለተ ክርስቶስ ድረስ በቁጥጥራቸው ሥር አዋሉት፡፡
ሆኖም እግዚአብሔር በባህርዩ መሐሪና ፈራጅ እንደመሆኑ መጠን ለፈራጅነቱና ለመሐሪነቱ የሚስማማ መንገድ አመቻችቶ መሐሪነቱንና ፈራጅነቱን በፈጸመበት በክርስቶስ ሞት ቤዛነት የሰው ልጅን ታረቀው፤ ያጣውንም ሕይወት መለሰለት፤ በምሥጢራተ ቤተ ክርስቲያን አማካኝነትም እንደገና ሕይወቱን እንዲያገኝ አደረገ (ዮሐ. 6÷56-58፤ ማር 16÷16)
    ይህን አስመልክቶ ቅዱስ ጳውሎስ ሲናገር‹‹በመጀመሪያው ሰው (አዳም) ሞት መጣ፣ በሁለተኛው ሰው (ክርስቶስ) ግን ትንሣኤ ሙታን ሆነ፤ሁሉም በአዳም እንደሚሞቱ እንደዚሁ ሁሉም በክርስቶስ  ሕያዋን ይሆናሉ›› ብሏል፤ (1ቆሮ 15÷21-22፤ሮሜ 5-12-19)
ከዚህ የምንረዳው ዓቢይ ቁም ነገር በአዳም አለመታዘዝ ምክንያት ያጣናት ሕይወት፣ በክርስቶስ መታዘዝ ያገኘናት መሆናችንን ነው፤ ጌታችንም ‹‹ትንሣኤና ሕይወት እኔ ነኝ፤ የሚያምንብኝ ቢሞት እንኳ ሕያው ይሆናል፤ ሕያው የሆነም፣ የሚያምንብኝም፣ ሁሉ ለዘላለም አይሞትም፤እኔም በመጨረሻይቱ ቀን አስነሣዋለሁ›› ብሎ ትንሣኤና ሕይወት መሆኑን እንደነገረን የሰው ልጅን ለዘላለማዊ ሕይወት እንደገና አበቃው (ዮሐ. 6÷54፤ 11÷25-26)
የዚህም እውነታ በትንሣኤው አበሰረን፣ የእርሱ ትንሣኤ የትንሣኤያችን ዋዜማ ነውና የቀደመችው ሕይወት እንደተመለሰችልን በትንሣኤው አየናት፤ አወቅናትም፤(ኤፌ.4÷5-7)
        የተወደዳችሁ የመንፈስ ቅዱስ ልጆቼ ምእመናንና ምእመናት
     የክርስቶስ ትንሣኤ ለሰው ልጅ የዘላለማዊ ሕይወት ማረጋገጫ ነው፤ለበርካታ ዘመናት በተስፋ ይጠበቅ የነበረው የክርስቶስ ነገረ አድኅኖ እና ነገረ ትንሣኤ በጊዜው ጊዜ እውን እንደሆነ ሁሉ፣ እንደዚያው በተስፋና በእምነት እየተጠባበቅነው ያለ የሰው ልጅ ሕይወታዊ ትንሣኤ ጊዜው ሲደርስ በክርስቶስ ዳግም ምጽአት እውን ይሆናል፤(1ቆሮ 15÷20-23፤1ተሰ 4÷13-18)
 ይሁን እንጂ ዛሬም ሕይወትን በሚሰጥ በእግዚአብሔር መንግሥት ውስጥ ያለን ስለሆን የሕይወትን ጣዕም አሁንም ማጣጣም እንችላለን፤ ሕይወት ጣዕም የሚኖረው በፍቅር ሲታጀብ ነው፣ ፍጹም ፍቅር የዘላለማዊ ሕይወት ኃይል ነው፤ ፍቅር ፍጹም የሚሆነው ሦስቱን አቅጣጫዎች ማእከል አድርጎ ሲገኝ ነው፤
 ይኸውም ወደ ላይ እግዚአብሔርን በፍጹም ፍቅር መከተል ስንችል፣ ወደጎን በአርአያ እግዚአብሔር የተፈጠረውን የሰው ልጅ በአጠቃላይ መውደድ ስንችል፣ ወደ ታች ደግሞ የምንኖርባትን ምድርና በውስጧ ያሉ ፍጥረታትን ስንንከባከብ ነው፣ ይህን ካደረግን ፍጹም ፍቅር ከእኛ  አለ ማለት እንችላለን፤ እግዚአብሔር ይህንን ዓይነት ፍቅር እንዲኖረን በሃይማኖት አስተምሮናል፡፡
    በመሆኑም እኛ ክርስቲያኖች ለእግዚአብሔር ያለንን ፍቅር ለመግለጽ በመዋዕለ ጾሙ በአምልኮ፣ በጾም፣ በጸሎት፣ በምጽዋትና በስግደት ስንገልጽ እንደቆየን ሁሉ፣ በፋሲካው በዓላችን እግዚአብሔር የሰጠንን በረከት ከተቸገሩ ወንድሞቻችንና እኅቶቻችን ጋር በመካፈል ለወገኖቻችን ያለንን ፍቅር ልንገልጽ ይገባናል፤
በዚህ ዕለት በዓሉን ስናከብር የተራቡትን በማብላት፣ የተጠሙትን በማጠጣት፣ የታረዙትን በማልበስ፣ ጧሪ የሌላቸው አረጋውያን፣ አሳዳጊ የሌላቸው ሕጻናት፣ በልዩ ልዩ ምክንያት የአካልና የአእምሮ ጉዳት ደርሶባቸው የበይ ተመልካች የሆኑ ወገኖች ሁሉ ከእኛ ጋር በማዕዳችን ተሳታፊ ሆነው በዓሉን በደስታና በምስጋና እንዲያከብሩ ማድረግ ክርስቲያናዊ ግዴታችን ነው፡፡
            የተወደዳችሁ የመንፈስ ቅዱስ ልጆቼ ምእመናንና ምእመናት
የትንሣኤ መሠረታዊ ትርጉም ከሞት በኋላ በሕይወት መኖርና መመላለስ ነው፤ ስለሆነም የትንሣኤን በዓል ስናከብር ባለፉት ዘመናት በድህነትና በኋላ ቀርነት ከሞት አፋፍ ደርሳ የነበረችውን ሀገራችን በልማትና በዕድገት ትንሣኤዋን ለማረጋገጥ ቃል በመግባት በዓሉን ማክበር ሀገራዊ ብቻ ሳይሆን ሃይማኖታዊ ግዴታ መሆኑን መገንዘብ አለብን፤
 ምክንያቱም ጠንክረን በመሥራት ምድራችንን እንድናለማና እንድንከባከብ ከሁሉ በፊት ያዘዘ እግዚአብሔር ነውና፤ በተለይም የልማታችን የጀርባ አጥንት ሆኖ እንደ ሚያገለግል ታላቅ ተስፋ የተጣለበት ታላቁ የሕዳሴ ግድብ በተያዘው ፍጥነት ሥራው ተሠርቶና ተጠናቆ የዕድገታችን ተሸካሚ ምሶሶ ሆኖ ማየት እንድንችል ሁሉም ኢትዮጵያዊ ድጋፉን አጠናክሮ እንዲቀጥል ቤተ ክርስቲያናችን ጥሪዋን ታስተላልፋለች፤
    የሀገራችን የልማትና የዕድገት መርሐ ግብሮች ዘርፈ ብዙ እንደመሆናቸው መጠን ገበሬው በየአካባቢው እያከናወነው የሚገኝ አፈርን የመገደብና አካባቢን በአረንጓዴ ልማት የማስዋብ ሥራ ያለመቋረጥ ተጠናክሮ እንዲቀጥል በማድረግ ረገድ ቤተ ክርስቲያችን በግባር ቀደም ተሰልፋ እንደምትሠራ በዚህ አጋጣሚ ለማረጋገጥ እንወዳለን፡፡
    በአሁኑ ጊዜ በሥራ ላይ ያሉም ሆኑ ወደፊት ሊሠሩ በእቅድ የተያዙ የሀገራችን የልማትና የእድገት ሥራዎች በሕዝቡ የተባበረ ድጋፍ ሲከናወኑ የሀገራችን ብልጽግና እውን እንደሚሆን የሁላችንም እምነት ነው
ስለሆነም ለዚህ ስኬት የኢትዮጵያውን ሁሉ ጽናት፣ አንድነት፣ ስምምነትና ፍቅር፣ ሰላምና ተቻችሎ መኖር የማይተካ ሚና እንዳላቸው ለአፍታ እንኳ መዘንጋት የለብንም፤
          የተወደዳችሁ የመንፈስ ቅዱስ ልጆቼ ምእመናንና ምእመናት
ልማታችን በተፈጥሮ ሀብት እንክብካቤ ብቻ ሳይሆን የተቀደሰውና የተከበረው ባህላችንና ሰብኣዊ ሥነ ምግባራችንን ጠብቆ በማስጠበቅ ጭምርም መሆን ይገባዋል
ኢትዮጵያ ሀገራችን ከጥንት ጀምሮ በቅዱሳት መጻሕፍት ሀገረ እግዚአብሔር ነች ተብሎ በተደጋጋሚ የተነገረላት ያለምክንያት አልነበረም
ኢትዮጵያውያን አባቶቻችን በማናቸውም ጊዜ ከነውረ ኃጢአትና ከርኩሰት ሁሉ ርቀው፣ ሕገ ተፈጥሮንና ሕገ እግዚአብሔርን ጠብቀው፣ እግዚአሔር የሚለውን ብቻ አዳምጠውና አክብረው የሚኖሩ ቅዱሳን በመሆናቸው እንጂ
በአሁኑ ጊዜ በኢትዮጵያ ምድር ሊፈጸም ቀርቶ ሊወራ የማይገባውን ሰዶምንና ገሞራን በእሳት ያጋየ ግብረ ኃጢአት በኢትዮጵያ ምድር መሰማቱ እግዚአብሔር ለኢትዮጵያውያን የሰጠውን የቅድስና ክብር የሚያሳጣ ከመሆኑም ሌላ በሀገራችን ላይ ልማትና ዕድገት ሳይሆን መቅሰፍትና ውድቀት እንዳያስከትልብን ሁሉም ኢትዮጵያዊ ይህንን የሰዶም ግብረ ኃጢአት በጽናት መመከት አለበት፤
ተፈጥሮን ለማልማት እየተረባረብን እንደሆነ ሁሉ ከዚህ ባልተናነሰ ሁኔታ የሰዶም ግብረ ኃጢአትን በመከላከል በቅዱስ ባህልና ሥነ ምግባር እጅግ የበለፀገና የለማ ትውልድ ማፍራት የልማታችን አካል ማድረግ አለብን፤
የኢትዮጵያ ኦርቶዶክስ ተዋሕዶ ቤተ ክርስቲያን ይህንን ግብረ ኃጢአት እስከ መጨረሻው ድረስ አምርራ የምትዋጋው መሆኑን በዚህ አጋጣሚ ለመላው ኢትዮጵያውያን ወገኖቻችን ማረጋገጥ እንፈልጋለን፤  ስለሆነም ሕዝባችን ለሰላምና ለአንድነት፣ ለእኩልነትና ለልማት፣ ለቅዱስ ባህልና ሥነ ምግባር ቅድሚያ ሰጥቶ በሁሉም አቅጣጫ ልማቱን እንዲያፋጥን፣ ሃይማኖቱንም እንዲጠብቅ መልክታችንን እናስተላልፋለን፡፡
መልካም የትንሣኤ በዓል ያድርግልን!!
እግዚአብሔር ኢትዮጵያንና ሕዝባችንን ይባርክ  ይቀድስ አሜን !!

አባ ማትያስ ቀዳማዊ
ፓትያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአክሱም ወእጨጌ ዘመንበረ ተክለሃይማኖ
ሚያዝያ 12 ቀን 2006 ዓ.ም
አዲስ አበባ

 
ዕለታተ ሰሙነ ሕማማት

ሰሙነ ሕማማት ምንድን ነው?

ከዕለተ ሆሣዕና ሰርክ እስከ ትንሣኤ ሌሊት ያለውን ጊዜ ወይም ቀናት የሚያመለክት ነው፡፡ ሐመ ማለት ታመመ ማለት ሲሆን ይህም የሰውን ዘር ሁሉ ከዲያብሎስ ባርነት ነፃ ለማውጣት ጌታችን አምላካችን ኢየሱስ ክርስቶስ በፈቃዱ የተቀበላቸውን ጸዋትወ መከራዎች የሚያሳስብ ነው፡፡ ዕለታቱ የዓመተ ኩነኔ ወይም የዓመተ ፍዳ ምሳሌዎች ናቸው፡፡ ክርስቲያኖች የክርስቶስን ውለታ እያሰቡ እጅግ የሚያዝኑበት፣ የሚያለቅሱበት፣ የሚሰግዱበት ቤት ንብረታቸውን ትተው ከሌላው ቀናትና ጊዜያት በተለየ መልኩ ቤተ ክርስቲያናቸውን የሚማጸኑበት፤ ጧት ማታ ደጅ የሚጠኑበት፤ ኃጢአታቸውን በቤተ ክርስቲያን አደባባይ ለካህኑ የሚናዘዙበት በዓመት አንድ ጊዜ ብቻ የሚገኝ ሳምንት ነው፡፡ በዚህ ሳምንት በመራብ በመጠማት በመውጣት በመውረድ በመስገድ በመጸለይ በመጾም በየሰዓቱ የጌታችን የኢየሱስ ክርስቶስን ጸዋትወ መከራዎች በማሰብ አብዝቶ ይሰገዳል፡፡ መከራውን፣ ሕማሙን፣ ድካሙን የሚያስታውሱ ከቅዱሳት መጻሕፍት ኢሳይያስ፣ ኤርምያስ መዝሙረ ዳዊት ግብረ ሕማማት ወዘተ በየሰዓቱ ይነበባል፡፡ መስቀል መሳለም የለም፡፡ ካህናትም እግዚአብሔር ይፍታህ አይሉም የሳምንቱ ሥርዓተ ፍትሐት አይደረግም፡፡ ይኸውም ይህ ሳምንት ከሞት ወደ ሕይወት የተሸጋገርንበት ከጨለማ ወደ ብርሃን የተጓዝንበት የመሸጋገሪያ ወቅት ምሳሌ በመሆኑ ነው፡፡ በዕለተ ምጽአት መላእክት የመለከት ድምጽ በማሰማት የዳግም ምጽአትን ዕለት ለማሳሰብ ምእመናን ጥሪውን ሰምተው ለዚህም አስቀድመው ተዘጋጅተው የበዓሉ ታዳሚዎች መሆናቸውን በማጠየቅ በዚህ ሳምንት ዲያቆኑ ቃጭል እየመታ በየሰዓቱ ምእመናኑን ያሳስባል፡፡

በሰሙነ ሕማማት የሚገኙ ዕለታትና ስያሜያት

ዕለተ ሰኑይ /ሰኞ/ ይህ ዕለት አንጾሖተ ቤተ መቅደስ /የቤተ መቅደስ መንጻት/ እና መርገመ በለስ የተፈጸመበት ዕለት ነው፡፡ /ማር.11-11፣ ማቴ.21-18-22 ሉቃ.13-6-9/፡፡ ወንጌላዊው ቅዱስ ሉቃስ «ወመሰለ ሎሙ ወይቤሎሙ አሐዱ ብእሲ በለሰ ቦቱ ውስተ አጸደ ወይኑ ወየሐውር ይንሣእ ፍሬሃ ወኢይረክብ ...»፤ ይህንም ምሳሌ አለ ለአንድ ሰው በወይኑ አትክልት የተተከለች በለስ ነበረችው ፍሬም ሊፈልግባት ወጥቶ ምንም አላገኘም፡፡ በማለት በበለስ ስለተመሰለ የሰው ልጅ ሕይወት በማሰብ እንዲመለስ ንስሐ እንዲገባ በሕይወትም እንዲኖር እግዚአብሔር ኢየሱስ ክርስቶስ ማሳሰቡን ያጠይቃል፡፡ ንስሐ አልገባም አልመለስም ያለም በለሷ እንደጠወለገችና እንደተቆረጠች ሁሉ ፍሬ ባለማፍራታቸው እንደሚቆረጡ እንዲሁም ወደ እሳት እንደሚጣሉ መጽሐፍ ቅዱስ በግልጽ ያስረዳል፡፡ በለስ የተባለች ቤተ እስራኤል ፍሬ የተባለ ደግሞ ሃይማኖትና ምግባርን ነው፡፡ ሁላችን ቤተ እስራኤላውያን ፍሬ ሃይማኖት ወምግባር አስተባብረን ይዘን መገኘት ይገባናል፡፡ ፍሬ አልባ እንዳንሆን ጌታ ሲመጣም እንዳናፍር የመጽሐፉን ቃል ልንጠብቅና ልንፈጽም ይገባናል፡፡ በዚህ የሕማማት የመጀመሪያ ቀን ዕለተ ሰኑይ የምናስበው የምንዘክረው የሰው ልጅ ሕይወት በከንቱ በቸልተኝነት እንዳይደክም እንዳይጠወለግ እንዳይደርቅ ወደ እሳትም እንዳይጣል ማድረግ ይገባናል፡፡

ዕለተ ሠሉስ /ማክሰኞ/ ይህ ቀን ጌታችን ሰኞ በተናገረውና ባደረገው ላይ አይሁድ ጥያቄ ያቀረቡበት እርሱም መልስ በመስጠት ያስተማረበት ዕለት ነው፡፡ በዚህም ምክንያት የጥያቄ እና የትምህርት ቀን በመባል ይታወቃል፡፡ ጥያቄውም ጌታ ባደረገው አንጽሖተ ቤተ መቅደስ ምክንያት ለጸሐፍትና ፈሪሳውያን ይኸውም ትምህርት ማስተማር፣ ተአምራት ማድረግ፣ ገበያ መፍታትን በማን ሥልጣን ታደርጋለህ? ይህንስ ሥልጣን ማን ሰጠህ?» የሚል ነበር፡፡ /ማቴ.21-23-27/፡፡ ሐዋርያው ቅዱስ ማቴዎስ «ወይቤሎሙ ኢየሱስ አማን እብለክሙ ከመ መጸብሓውያን ወዘማውያት ይቀድሙክሙ ውስተ መንግሥተ እግዚአብሔር»፤ ኢየሱስ እንዲህ አላቸው እውነት እላችኋለሁ ቀራጮችና ጋለሞቶች ወደ እግዚአብሔር መንግሥት በመግባት ይቀድሙአችኋል ሲል አስተምሯል፡፡ /ማቴ.21-28/

ዕለተ ረቡዕ ይህ ዕለት ደግሞ የአይሁድ ሊቃነ ካህናትና ጸሐፍት ጌታን እንዴት መያዝ እንደሚችሉ ምክር የጀመሩበት ቀን ነው፡፡ በዚህም ምክንያት ዕለቱ የምክር ቀን በመባል ይጠራል፡፡

ዕለተ ሐሙስ ጌታችን ኢየሱስ ክርስቶስ በዚህ ዕለት ፍጹም ሰው ፍጹም አምላክ መሆኑን ለመግለጥ እና ለአርአያነት ጸሐፍት ፈሪሳውያን የአይሁድ ካህናት መጥተው እስኪይዙት ድረስ ሲጸልይ በማደሩ ምክንያት ጸሎተ ሐሙስ በመባል ይታወቃል፡፡ ትሕትና ፍቅር መታዘዝ እንዲሁም የአገልግሎትን ትርጉም ለማስረዳትና ለማስገንዘብ የደቀ መዛሙርቱን እግር በማጠቡ ሕጽበተ ሐሙስ በመባልም እንደሚጠራ ሊቃውንተ ቤተ ክርስቲያን ይናገራሉ፡፡ ሐዋርያው ቅዱስ ዮሐንስም «ወሶበ ኀፀቦሙ እገሪሆሙ ነሥአ አልባሲሁ ወረፈቀ ካዕበ ወይቤሎሙ አእመርክሙኑ ዘገበርኩ ለክሙ ... ወሶበ አነ እንከ ሊቅክሙ ወእግዚእክሙ ኀፀብኩክሙ እገሪክሙ ከማሁኬ አንትሙኒ ይደልወክሙ ትኅፅቡ እግረ ቢጽክሙ፡፡»፤ «እግራቸውንም አጥቦ ልብሱንም አንሥቶ ዳግመኛ ተቀመጠ እንዲህም አላቸው ያደረግሁላችሁን ታስተውሉታላችሁን?... እንግዲህ እኔ ጌታና መምህር ስሆን እግራችሁን ካጠብሁ እናንተ ደግሞ እርስ በእርሳችሁ ትተጣጠቡ ዘንድ ይገባችኋል ሲል ተናግሯል፡፡ /ዮሐ.13-12-20/፡፡ ይህ ስለ እናንተ በመስቀል ላይ የሚቆረሰው ሥጋዬ ነው እንካችሁ ብሉ፤ ይህ ስለ እናንተ የሚፈስ ደሜ ነው ከእርሱ ጠጡ በማለት ምሥጢረ ቁርባንን የመሠረተበት ወይም ራሱ ምስጢረ ቁርባንን የጀመረበት ቀን በመሆኑ የምስጢር ቀን ተብሎ ይጠራል፡፡ ይኸውም የሰው ልጆች ሥጋውንና ደሙን ተቀብለን ከእርሱ ጋር አንድነትና ኅብረት እንዲኖረን ጥንተ ጠላት ዲለብሎስንም ፍጹም ድል ነሥተን ሰማያዊት ርስት መንግሥተ ሰማያትን እንድንወርስ ለማስቻል ነው፡፡ /ማቴ.26-26-29/፡፡ አይሁድ ጌታችንን ለመያዝ በእነርሱ ጥበብና ፍላጐት ቀስ ብለው መጥተው የያዙበት ቀን ስለሆነ በዚህ ዕለት በለሆሳስ /ብዙ የድምጽ ጩኸት ሳይሰማ/ የቅዳሴ ሥርዓት ይፈጸማል፡፡ ስለሆነም መላው ሕዝበ ክርስቲያን በዚህ የሕጽበት፣ የምስጢር፣ የጸሎት ቀን በተባለው በዚህ ዕለት በንስሓ ታጥበው ሥጋ ወደሙ እንዲቀበሉ ቤተ ክርስቲያን በአጽንኦት ታስተምራለች፡፡

ዕለተ ዐርብ ሐዋርያው ቅዱስ ጳዉሎስ «አውቀውስ ቢሆን የክብርን ጌታ ባልሰቀሉት» /1ቆሮ.1-18/፡፡ እንዳለ ይህ ዕለት የአይሁድ ካህናት ያለበደል ያለጥፋት ንጹሕና ጻድቅ የሆነውን ጌታ የሰቀሉበት ዕለት ነው፡፡ ዕለቱም ጌታችን መድኃኒታችን ኢየሱስ ክርስቶስ የዓለም ሁሉ መድኃኒት ለአዳምና ለልጆቹ ሲል በመልእልተ መስቀል በቀራንዮ አደባባይ ተሰቅሎ መዋሉን የምናስብበት ታላቅ ቀን ነው፡፡ /ማቴ.27-35-75/፡፡ በዚያን ጊዜ አሳልፎ የሰጠው ይሁዳ እንደተፈረደበት አይቶ ተጸጸተ ሠላሳውንም ብር ለካህናት አለቆችና ለሽማግሎች መልሶ ንጹሕ ደም አሳልፌ በመስጠቴ በድያለሁ አለ፡፡ እነርሱ ግን እኛስ ምን አግዶን? አንተው ተጠንቀቅ አሉ፡፡ ብሩንም በቤተ መቅደስ ጥሎ ሔደና ታንቆ ሞተ፡፡ የካህናት አለቆችም ብሩን አንሥተው የደም ዋጋ ነውና ወደ መባ ልንጨምረው አልተፈቀደም አሉ፡፡ ተማክረውም የሸክላ ሠሪ መሬት ለእንግዶች መቃብር ገዙበት፡፡ ስለዚህ ያ መሬት እስከ ዛሬ ድረስ የደም መሬት ተባለ፡፡ /ማቴ.27-3-9/ የሰው ልጆች በዘር ኃጢአት /ቁራኝነት/ ይኖሩበት የነበረው የጨለማ ሕይወት ያከተመበት ፍጹም ድኅነት ያገኙባት ታላቅ ዕለት ናት፡፡ ክርስቲያኖች ሁልጊዜም ዕለተ ዓርብ ሲመጣ ሕማሙን ስቅለቱን ሞቱን የሚያስቡበት ጊዜ ነው፡፡ በሮማውያን ሕግና ሥርዓት መስቀል የወንጀለኞች መቅጫ ምልክት የሕይወት መቅጫ አርማ ሆኖ ሳለ ለእኛ የዲያብሎስ ድል መንሻ ስላደረገው በስቅለቱና በሞቱም ሕይወትን ስለአገኘን በዚህም ምክንያት መልካሙ ዓርብ በመባል እንደሚታወቅ የቤተ ክርስቲያን አባቶች ያትታሉ፡፡

ቀዳሜ ስዑር ዕለተ ቅዳሜ እግዚአብሔር የሚታዩትንና የማይታዩትን፣ በእግር የሚሄዱትን እና በክንፍ የሚበሩትን በባሕር የሚዋኙትን እንስሳትን በመጨረሻም ሰውን በአርአያውና በአምሳሉ ፈጥሮ ያረፈበት ዕለት ነች፡፡ ይህች የመጀመሪያው ቅዳሜ ለእግዚአብሔር የዕረፍት ዕለት ናት እግዚአብሔርን ሥነ ፍጥረት ፈጥሮ ስላረፈበት ሰንበት ዐባይ /ታላቋ ሰንበት/ ትባላለች ታላቋን ሰንበት እስራኤላውያን እንዲያከብሯት ታዟል፡፡ ዘፍ.1፡3፡፡ ዕለተ ቀዳሚት /ሰንበት ዐባይ/ በዘመነ ሐዲስም የተለየ የደኅነት ሥራ ተከናውኖባታል፡፡ ጥንት ሥነ ፈጥረትን በመፍጠር ዕረፍት እንደ ተደረገባት ሁሉ የፍጥረት ሁሉ ቁንጮ የሆነውን አዳምን ለማዳን ሕማምና ሞት የተቀበለው ቸሩ አምላክ በመቃብር አርፎባታል፡፡ ማቴ.27፡61፡፡ በዚህች ዕለት ጌታችን ኢየሱስ ክርስቶስ በከርሰ መቃብር ዐርፎ የዋለባት ዕለት በመሆኗ «ቀዳሜ ስዑር » ትሰኛለች፡፡

ስዑር ቀዳሜ የተባለችው በዓመት አንድ ቀን ስለ ምትጾም ነው፡፡ ምክንያቱም እናቱ ድንግል ማርያም ወዳጆቹ ቅዱሳን ሐዋርያት ጌታ ተላልፎ ከተሰጠበት ዕለት አንስተው ብርሃነ ትንሣኤውን እስኪያዩ ድረስ እህል ውኃ በአፋቸው አልዞረም፡፡ ይመኩበትና ተስፋ ያደረጉት የነበረ አምላካቸው በመቃብር ስላረፈ ዕለቷን ሞቱን በማሰብ ትንሣኤውን በመናፈቅ በጾም አክብረዋታል፡፡ ከቅዱሳን ሐዋርያት ሲወርድ ሲወራረድ በመጣው ትውፊት መሠረት ቅዱሳን ሐዋርያት በማዘን በመጾምና በመጸለይ ዕለቷ እንዳከበሯት የተዋሕዶ ልጆች የተቻላቸው ከዓርብ ጀምረው የሚያከፍሉ /የሚጾሙ/ ለሁለት ቀን እህል ውኃ ሳይቀምሱ ያድራሉ ያልተቻላቸው ደግሞ ዓርብ ማታ በልተው ቅዳሜን በመጾም ትንሣኤን ያከብራሉ፡፡ በዚህ ዕለት ከሰኞ ከሆሣዕና ማግሥት ጀምረው እስከ ስቅለተ ዓርብ ድረስ በስግደት እና በጾም ያሳለፉ ምእመናን በዕለተ ቅዳሜ በቅጽረ ቤተ ክርስቲያን ይሰበሰባሉ፡፡ የጠዋቱ ጸሎት ሲፈጸም ካህናቱ «ገብረ ሰላመ በመስቀሉ፡-በመስቀሉ ሰላምን መሠረተ» የምሥራች እያሉ በቤተ ክርስቲያን ለተሰበሰቡት ምእመናን ቄጠማ ይታደላል ቄጠማው የምሥራች ምልክት ነው፡፡ ቄጠማው የምሥራች ምልክት ተደርጐ የተወሰደው በኖህ ዘመን ከተፈጸመው ታሪክ ጋር በማቆራኘት ነው፡፡

ቅዱስ መጽሐፍ እንደሚነግረን በጻድቁ ኖኅ ዘመን የነበሩ ሕዝቦች ከሕገ እግዚአብሔር ውጪ ሆነው እጅግ የሚያሳዝን ኃጢአት በሠሩ ጊዜ በንፍር ውኃ ተጥለቅልቀዋል፡፡ በወቅቱ ጻድቁ ኖኅ ወደ መርከብ ይዞአቸው ከገባው እንስሳት መካከል የውኃውን መጉደል ለመረዳት ርግብን በመርከብ መስኮት አሾልኮ ይለቃታል፤ እርሷም ቄጠማ በአፍዋ ይዛ ትመልሳለች፡፡ ዘፍ.9-1-29፡፡ ኖኅም በዚህ ቄጠማ የውኃውን መድረቅ ተረድቶ ተደስቷል፡፡

«ቄጠማ»፣ ለጥፋት ውኃ መድረቅ የምሥራች መንገሪያ እንደሆነ አሁንም በክርስቶስ ሞት ሞተ ነፍስ ከሰው ልጆች ተወገደ ስትል ቤተ ክርስቲያን ለልጆቿ ቄጠማ ታድላለች፡፡ ምእመናንም የምሥራች ተምሳሌት የሆነውን ቄጠማ በግንባራቸው ያስሩታል፡፡ የክርስቶስ ተከታዮች ሁሉ ከጨለማ ወደ ብርሃን ከሚያቃጥለው ዋዕየ ሲኦል /የሲኦል ቃጠሎ/ ወደ ልምላሜ ገነት ጥንተ ማኅደራቸው መመለሳቸውን በዚህ አኳሃን እየገለጡ በዓለ ትንሣኤን በቅድስት ቤተ ክርስቲያን ያከብራሉ፡፡

 
ብፁዕ ወቅዱስ አቡነ ማቲያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳ ዘአክሱም ወእጨጌ ዘመንበረ ተክለሃይማኖት የ2006 ዓ.ም.የ2006 ዓ.ም. ዐብይ ጾምን አስመልክቶ ቃለ ምዕዳን አስተላለፉ

0908

ብፁዕ ወቅዱስ አቡነ ማቲያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳ ዘአክሱም ወእጨጌ ዘመንበረ ተክለሃይማኖት የ2006 ዓ.ም. ዐቢይ ጾም አስመልክቶ እንኳን በሰላም አደረሳችሁ ባሉበት ወቅት “ጾም ለመንፈሳዊ ሕይወት መጎልበት፣ ራስን ለመግዛት፣ ከእግዚአብሔር ጋር ልዩ ግንኙነትና አንድነት ለመፍጠር እጅግ አስፈላጊ ነው” ሲሉ ተናግረዋል፡፡

ቅዱስነታቸው ዐብይ ጾሙን አስመልክቶ ያስተላለፉትን ሙሉ ቃል ከዚህ በታች ይመልከቱ፡፡
መልእክት ዘእም ኀበ ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት በእንተ በዓለ ጾም ዓቢይ ዘእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት፡፡
በስመ አብ ወወልድ ወመንፈስ ቅዱስ አሐዱ አምላክ አሜን፡፡

በሀገር ውስጥም ኾነ በውጭ የምትኖሩ የኢትዮጵያ ኦርቶዶክስ ተዋሕዶ ቤተ ክርስቲያን ምእመናንና ምእመናት የመንፈስ ቅዱስ ልጆቻችን በሙሉ፡-
እግዚአብሔር አምላክ እንኳን ለ፳፻፮ ዓ.ም. የጌታችን የአምላካችንና የመድኃኒታችን የኢየሱስ ክርስቶስ መዋዕለ ጾም በሰላም አደረሳችኁ፡፡
‹‹ወእመሰ በምግባረ መንፈስ ቀተልክምዎ ለምግባረ ነፍስትክሙ ተሐይዉ ለዓለም፤ በመንፈሳዊ ሥራ ሥጋዊ ሥራችኹን ብትገድሉ ለዘላለሙ ትድናላችኹ፡፡›› /ሮሜ ፰÷፲፫/
ጾም ከጥንት ጀምሮ በዘመነ ብሉይም በዘመነ ሐዲስ የተወደደ፣ የፈቃደ ሥጋ መቆጣጠሪያ፣ የፈቃደ ነፍስ ማበልጸጊያ መሣርያ ነው፤ እነሙሴ፣ እነኤልያስ እና እነዳንኤል ከእግዚአብሔር ጋራ በቀጥታ ይገናኙ የነበረው ራሳቸውን በጾም ለእግዚአብሔር በማስገዛት ነው፡፡

ጌታችን አምላካችንና መድኃኒታችን ኢየሱስ ክርስቶስም ዓርባ መዓልትና ዓርባ ሌሊት ጾሞ፣ በሰይጣን የቀረበለትን ፈተና አሸንፎ፣ የጾምን ድል አድራጊነት በተግባርና በትምህርት አሳይቶናል፤ (ማቴ. ፬÷፩ -፲፩)
ቅዱሳን ሐዋርያትም እግዚአብሔር ሥራቸውን እንዲያቃናላቸው፣ ኃይለ መዊዕ (የአሸናፊነት ኃይል) እንዲሰጣቸው በየጊዜው ይጸልዩ ነበር፤ (ግብ. ሐዋ. ፲÷፳፫)
ሐዋርያዊት፣ ጥንታዊትና ህልውት በኵሉ የኾነች የኢትዮጵያ ኦርቶዶክስ ተዋሕዶ ቤተ ክርስቲያንም ከነቢያት፣ ከጌታችንና ከሐዋርያት በተማረችው ትምህርትና በተቀበለችው ትውፊት መሠረት ከእግዚአብሔር ጋራ ለመገናኘት፣ ኃይለ አጋንንትን ድል ለማድረግ፣ ከእግዚአብሔር በረከትንና ረድኤትን ለማግኘት ጾምን ትጾማለች፡፡
ሰው በተፈጥሮው እርስ በርስ የሚጋጩ ኹለት ፍላጎቶች በውስጡ እንዳሉ ቅዱስ መጽሐፍ ይነግረናል፤ እነዚኽ ፍላጎቶች ሥጋዊና መንፈሳዊ ተብለው የሚታወቁ ሲኾን፣ የሥጋ ፍላጎት ለነፍስ ፍላጎት፣ የነፍስ ፍላጎትም ለሥጋ ፍላጎት ተቃራኒ እንደኾነ በቅዱሳት መጻሕፍት ተብራርቶና ተገልጾ ተቀምጦአል፡፡ (ገላ. ፭÷፲፮-፲፰)
ሐዋርያው ቅዱስ ጳውሎስ ይህን በተመለከተ ሲያስተምር ‹‹የሥጋ ፍላጎት ሞትን ያመጣል፤ የነፍስ ፍላጎት ግን ሰላምንና ሕይወትን ይሰጠናል፤›› ብሏል፤ (ሮሜ ፮÷፮-፰)
የጾም አስፈላጊነት የሚመነጨውም ከዚኽ መሠረታዊ ትምህርት ነው፡፡ ሥጋ ኃይልና ሙቀት ሰጪ ምግቦችን አብዝቶ በተመገበ ቁጥር ኃይል ይሰማዋል፤ በዚኽ ጊዜ ለእግዚአብሔር መታዘዝን ይዘነጋል፤ ወንድሙን ለመበደል ይፈጥናል፤ ማመዛዘን አይችልም፤ ብዙ ስሕተትንም ይፈጽማል፤ በመጨረሻም ይሞታል ማለትም ከእግዚአብሔር ጋራ አንድነትን ያጣል፤ በመንፈሳዊ እይታ ከእግዚአብሔር አንድነት መለየት እጅግ በጣም የከፋ ሞት ነው፡፡
በአንጻሩ ደግሞ ሰው ከምግብ በታቀበ ጊዜ ረጋ ብሎ ማሰብን፣ ማስተዋልን፣ ማመዛዘንን፣ ለእግዚአብሔር መታዘዝን፣ ራስን መግዛትን፣ ርኅራኄንና ቸርነትን፣ ለወንድም አዛኝነትን ገንዘብ ያደርጋል፤ በመጨረሻም ከእግዚአብሔር ጋራ አንድነቱን ያጠነክራል፤ በዚኽም የሞት አሸናፊ ኾኖ በእግዚአብሔር መንግሥት በዘላለማዊ ሕይወትና ክብር ተደስቶ ይኖራል፤
ከዚኽ አኳያ ጾም ለመንፈሳዊ ሕይወት መጎልበት፣ ራስን በመግዛት ከእግዚአብሔር ጋራ ልዩ ግንኙነትና አንድነት ለመፍጠር እጅግ አስፈላጊ ኾኖ ይገኛል፡፡
ጾማችን በእግዚአብሔር ፊት ተቀባይነት አግኝቶ ሙሉ ዋጋ ሊያሰጠን የሚችለው ከፍቅር፣ ከምጽዋት፣ ከሰላም፣ ከጸሎትና ራስን ለእግዚአብሔር ከማስገዛት ጋራ ሲኾን ነው፡፡


የተወደዳችኹ የመንፈስ ቅዱስ ልጆቼ ምእመናንና ምእመናት!

በፍጹም ሓሳባችን፣ በሙሉ ኃይላችንና በፍጹም ልቡናችን ለእግዚአብሔር በምንገዛበት በዚኽ ወቅት ካለን ሀብት ከፍለን፣ በየሰፈሩ የሚገኙ ጧሪ የሌላቸው አረጋውያንን፣ አሳዳጊ የሌላቸው ሕፃናትን፣ ሠርተው ራሳቸውን መርዳት ያልቻሉ አካል ጉዳተኞችን በመርዳት ጾሙን ልንጾም ይገባል፡፡
ወርኃ ጾም በመንፈሳዊ ሕይወታችንም በሥጋዊ ኑሯችን ከምንም ጊዜ በበለጠ ግዙፍና ታላላቅ ሥራዎችን ሠርተን የምናጠናቅቅበት ጊዜ ሊኾን ይገባል፡፡
በተለይም በመንፈሳዊ ሕይወታችን ለእግዚአብሔር ያለንን ተገዥነት ለማረጋገጥ፣ በመንፈስና በጽድቅ ኾነን በየቀኑ አብዝተን የምንጾምበትና የምንሰግድበት ሊኾን ይገባል፡፡
በሥጋዊ ኑሯችንም ሥራ ከሚያስፈቱን ነገሮች ኹሉ ርቀን ቀኑን በሙሉ በሥራ ላይ የምናውልበት ሊኾን ይገባል፡፡ በመኾኑም ሕዝበ ክርስቲያኑ በአገራችን የተጀመረውን የአረንጓዴ ልማት ለማሳካት አፈርን የመገደብና መስኖን የማስፋፋት ሥራ አጠናክሮ እንዲሠራና ወርኃ ጾሙን በላቀ የሥራ ርብርብ እንዲያሳልፍ መልእክታችንን ከአደራ ጭምር እናስተላልፋለን፡፡

በመጨረሻም፡-

እግዚአብሔር አምላክ ወርኃ ጾሙን መልካም የንስሐ፣ የሰላም፣ የፍቅርና የሥራ ጊዜ አድርጎ በማስፈጸም ለጌታችን መድኃኒታችን ኢየሱስ ክርስቶስ በዓለ ትንሣኤ በሰላምና በጤና እንዲያደርሰን በጾምና በጸሎት እንትጋ በማለት መልእክታችንን በድጋሚ እናስተላልፋለን፡፡

እግዚአብሔር አምላክ ኢትዮጵያንና ሕዝባችንን ይባርክ ይቀድስ አሜን!!

አባ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት
የካቲት ፲፮ ቀን ፳፻፮ ዓ.ም.

 
የ2006ዓ.ም የጥምቀት በዓል በድምቀት ተከበረ

እንኳን ለጌታችን ለአምላካችን ለመድኀኒታችን ለኢየሱስ ክርስቶስ በዓለ ጥመቀት በሰላም በጤና በሕይወት አደረሳችሁ፡፡

6

በየዓመቱ ጥር 10 እና 11 የሚከበረው የጌታችን የአምላካችን የመድኀኒታችን የኢየሱስ ክርስቶስ በዓለ ጥመቀት በደብረ ነጎድጓድ ቅዱስ ዮሐንስ ቤተክርስቲያን መሪነት ከ13 ታቦታት በላይ በሚያድሩበት በጃን ሜዳ ብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ  ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት፣ ብፁአን ሊቃነ ጳጳሳት እንዲሁም በመቶ ሽህ የሚቆጠሩ ምዕመናን በተገኙበት እጅግ በጣም በደመቀ ሁኔታ በዓሉ ተከብሮ ውልዋል፡፡ የዓመቱ ተረኛ የሆነው የደብረ ነጎድጓድ ቅዱስ ዮሐንስ ቤተክርስቲያን መዘምራን ዕለቱን በማስመልከት ያሬዳዊ ዝማሬ ‹‹ ተሰሃልከ እግዚኦ ምደረከ ሃሌ ሉያ ወረደ ወልድ እም ሰማያት ውስተ ምጥማቃት በፍስሐ ወበሰላም››በማለት ያሬዳዊ ዜማ አቅርበዋል፡፡የደብሩ ፍቁረ እግዚእ ሰንበት ትምህርት ቤት አባላትም “በሰላም አስተርአየ፡ አስተርአየ ወልደ አምላክ፤ ወተወልደ በሀገረ ዳዊት ተወልደ፤ በዮርዳኖስ ተጠምቀ ከመይቤዝወነ” እያሉ ዝማሬ በማቅረብ በዓሉን አድምቀውታል::

 በቤተክርስቲያናችን ሥርዓት መሠረት ዐበይት በዓላት ተብለው ከሚጠቀሱት መካከል የጥምቀት በዓል አንዱ ነው፡፡ይህም በዓል ጌታችን መድኃኒታችን ኢየሱስ ክርስቶስ በእደ ዮሐንስ ፤ በማእከለ ዮርዳኖስ የተጠመቀበትን ቅድስት ቤተክርስቲያናችን በየዓመቱ ከዋዜማው ከጥር 10 ጀምሮ በደመቀ ሁኔታ በማክበር ላይ ትገኛለች፡፡ ለእኛ አብነት ይሆነን ዘንድ፤ የእዳ ደብዳቤያችንን እንደ ገል ቀጥቅጦ እንደ ሰም አቅልጦ በደላችንን ይደመስስ ዘንድ ጌታ በዮርዳኖስ ወንዝ ተጠመቀ፡፡
የኢትዮጵያ ኦርቶዶክስ ተዋሕዶ ቤተክርስቲያን ይህንን መሠረት በማረድግ በየአብያተ ክርስቲያናቱ የሚገኙ ታቦታት በብፁዓን አበው ሊቃነ ጳጳሳት፣ በሊቃውንተ ቤተክርስቲያን፣ በካህናትና ዲያቆናት፤ የቅድስት ሥላሴ መንፈሳዊ ኮሌጅ ደቀ መዛሙርት ፤እንዲሁም በሰንበት ት/ቤቶች መዘምራንና ምዕመናን በዝማሬ በመታጀብ በአቅራቢያቸው ወደሚገኘው ታቦት ማደሪያ በማምራት ጌታችን መድኃኒታችን ኢየሱስ ክርስቶስ ከገሊላ ወደ ዮርዳኖስ ወንዝ በመሔድ በዮሐንስ እጅ ለመጠመቅ ማምራቱን ያበስራሉ፡፡ ‹‹ያን ጊዜም ጌታችን ኢየሱስ ክርስቶስ ከገሊላ ናዝሬት መጣ ዮሐንስም በዮርዳኖሰ ወንዝ አጠመቀው›› እንዲል፡፡/ማቴ.3፡1/ ቅድስት ቤተ ክርስቲያን መስራቿን መድኅነ ዓለም ክርስቶስን ለዓለም የምትሰብክበት፣ ከእርሱም ያገኘችውን፣ ይህም ዓለም እንደሚሰጠው ያልሆነውን፣ የእግዚአብሔር ልጅነት፣ ሰላም፣ ፍቅርና ትሕትና ለዓለሙ ትሰብክበታለች፡፡ እንዲሁም ለሀገራችን በጎ ገጽታን በመፍጠር ረገድ ከተለያዩ ሀገራት የሚመጡ ጎብኚዎች ተደንቀው የሚያዩትና በመስተንግዶው የሚደመሙበት በመሆኑ ሃይማኖታዊ በዓሉን በልዩ ትኩረት ታከብራለች፡፡

e1

በኢትዮጵያ ኦርቶዶክስ ተወሕዶ ቤተ ክርስቲያን መንበረ ፓትርያርክ ጠቅላይ ቤተ ክህነት በወጣው መርሐ ግብር መሠረት በአዲስ አበባ ከተማ ከ46 ያላነሱ የታቦታት ማደሪያዎች የሚገኙ ሲሆን ከእነዚህም መካከል :-የታዕካ ነገሥት በዓታ ለማርያም ገዳም፣ የመንበረ ፀባኦት ቅድስት ሥላሴ ካቴድራል፣ የገነተ ፅጌ ቅዱስ ጊዮርጊስ፣ የመንበረ መንግሥት ቅዱስ ገብርኤል ገዳም፣ የቀጨኔ ደብረ ሰላም መድኃኔዓለም፣ የመንበረ ፓትርያርክ ቅድስት ቅዱሳን ማርያም፣ የደብረ ነጐድጓድ ቅዱስ ዮሐንስ፣ የመንበረ ልዑል ቅዱስ ማርቆስ የቀበና መካነ ሕይወት አቡነ ገ/መንፈስ ቅዱስ፣ የገነተ ኢየሱስ፣ የአንቀፀ ምህረት ቅዱስ ሚካኤል ታቦታት የዓለምን ትኩረት በሚስበው በጃን ሜዳ ያደሩ ሲሆን ታቦታቱ ከየመንበረ ክብራቸው ተነስተው ጥር 10 ቀን 2006 ዓ.ም ከቀኑ 11 ሰዓት ሲሆን ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ የሊቀ ጳጳስ ዘአክሱም ወእጨጌ ዘመንበረ ተክለሃይማኖት፣ ብፁዐን ሊቃነ ጳጳሳት፣ ከሀገር ውጭ እና ከሀገር ውስጥ የመጡ ጐብኚዎች፣ በርካታ ካህናት እና የሰንበት ት/ቤቶች ወጣቶች እና ማህበረ ምዕመናን ከቦታው የተገኙ ሲሆን በሊቃውንተ ቤተ ክርስቲያን እና በሰንበት ት/ቤቶች ወጣቶች ያሬዳዊ ወረቦች ቀርበዋል፡፡
በብፁዕ አቡነ ሰላማ የመንበረ መንግሥት ቅዱስ ገብርኤል እና በዓታ ለማርያም ገዳማት የበላይ ጠባቂ አጭር ትምህርት ተሰጥቶአል ብፁዕነታቸው በሰጡት ትምህርት ይህ ዕለት አባታችን አዳም እና እናታችን ሄዋን ከወደቁበት ቦታ የተነሱበት ዕለት ነው፡፡ ነቢያት ፈኑ እዴከ በማለት ልመና ሲአቀርቡ ኑረዋል ዓመተ ምህርት የታየው በዛሬው ዕለት ነው፡፡ ጌታ በመወለዱ ሰውና መላእክት፣ ህዝብ እና አህዛብ ነፍስና ሥጋ አንድ ሆነዋል፡፡ ዕርቅ ተመሥርቷል አዳም እና ሔዋን ከዲያብሎስ ባርነት ነፃ ወጥተዋል ጌታችን እና መድኃኒታችን ኢየሱስ ክርስቶስ ሲጠመቅ በዮርዳኖስ የተጣለው የዕዳ ደብዳቤአችን ተደምስሶልናል፡፡ እኛም ከአብርከ መንፈስ ቅዱስ ከማህፀነ ዮርዳኖስ ተወልደናል አስቀድሞ በነቢዩ ሕዝቅኤል በጥሩ ውሀ እረጫችሁአለሁ እናንተም ትነፀላችሁ ተብሎ የተነገረው ትንቢት ተፈጽሟል፡፡ ፍጡሩ ዮሐንስ ጌታን ሲአጠምቀው በማን ስም አጠምቅሀለሁ የሚል ጥያቄ ጠይቆት ስለነበር ጌታም ወልዱ ለቡሩክ ከሣቴ ብርሃን ተሣሃለኒ በል በማለት ብፁዕነታቸው ሰፋ ያለ ትምህርት ካስተማሩ በኋላ በመጨረሻም ብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት የሚከተለውን ትምህርታዊ መልእክትና ቃለ ቡራኬ ሰጥተዋል፡፡ ዓመቱን ሁሉ በሰላም ጠብቆ ላገናኘን ለአምላካችን ለአግዚአብሔር ክብር እና ምሥጋና ይግባሉ አሜን መጽአ ኢየሱስ እምገሊላ ከመይጠመቅ እም ዮሐንስ ጌታችን እና መድኃኒታችን ኢየሱስ ክርስቶስ አምስት ሺህ አምስት መቶ ዘመን የተጫነብንን ሸክም አስወግዶልናል፡፡ ከዲያብሎስ ቁራኛነት አላቀቀን የመንግሥቱ ዜጐች አደረገን፡፡ የመንግሥቱ ዜጐችም የሆንበት በጥምቀት ነው፡፡ ለዚህ ታላቅ በዓል ያደረሰን አምላካችን እግዚአብሔር የተመሰገነ ይሁን በማለት ቅዱስነታቸው አጠር ያለ መልእክት አስተላልፈው ቡራኬ ሰጥተዋል፡፡ በማግሥቱ ጥር 11 ቀን 2006 ዓ.ም ከጧቱ አንድ ሰዐት ሲሆን ልብሰ ተካህኖ በለበሱ ካህናተ ጸሎተ ወንጌል ተደርሷል ብፁዕ ወቅዱስ ፓትርያርኩ እና ብፁን ሊቃነ ጳጳሳት ጸሎተ ኪዳን ካደረሱ በኋላ ቅዱስነታቸው ጥምቀተ ባህሩን ባርከው በርካታ ምዕመናንን የበረከት ጸበል እንዲረጩ ተደርጓል በማያያዝ በመዘምራን እና በሰንበት ት/ቤቶች ወጣቶች ያሬዳዊ ወረብ ቀርቧል በጠቅላይ ቤተ ክህነት እና በአዲስ አበባ ሀገረ ስብከት የተዘጋጁ መጽሔቶች እና በራሪ ጹሑፎች ለብፁዓን አባቶች፣ ለክብር ዕንግዶች እና ለምዕመናን በነፃ ተሠራጭቷል፡፡
ከዚያም በቅዱስነታቸው መልካም ፈቃድ ዶ/ር ዮሊየስ ሊቀ ጳጳስ የህንድ ኦርቶዶክስ ተዋሖዶ ቤተ ክርስቲያንን በመወከል የሚከተለውን መልአክት አስተላልፈዋል፡፡
ብፁዕ ወቅዱስ አባታችን አቡነ ማትያስ የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ በዚህ ታሪካዊ በዓል ላይ የተሰበሰባችሁ ታላቅ ሕዝብ በቅድሚያ በሕንድ ኦርቶዶክስ ተዋሕዶ ቤተ ክርስቲያን እና በፓትርያርኩ ስም ለዚህ ለተቀደሰ ጉባኤ ሰላምታዬን አቀርባለሁ፡፡
የሕንድ ኦርቶዶክስ ተዋሕዶ ቤተ ክርስቲያን ከኢትዮጵያ ኦርቶዶክስ ተዋሕዶ ቤተ ክርስቲያን ጋር እጅግ የጠበቀ ግንኙነት አላት፡፡ ግንኙታችንንም የበለጠ አጠናክረን እንቀጥላለን በዚህ ቅዱስ በዓል እና በዚህ ታላቅ ሕዝብ በመካከል በመገኘቴ እጅግ በጣም ደስተኛ ነኝ ይህንን በዓል ስናስብ የስላሴን አንድነት እና ሶስትነት እናያለን በዮርዳኖስ በጥምቀት ኃጢአታችን ተወግዷል፡፡ ቅዱስ ዮሐንስ የእውነት ምስክር ነው፡፡ ሁላችንም እውነተኞች ልንሆን ይገባናል፡፡ ቅዱስ ዮሐንስ ነቢይ ነው ቤተ ክርስቲያንም የነቢይነት ሥራ ትሠራለች፡፡ ቅዱስ ዮሐንስ ጌታን በማጥመቁ ምንኛ እድለኛ ነው የቅዱስ ዮሐንስ ክህነት የቤተ ክርስቲያናችንን ማዕረገ ክህነት ታላቅነት ያሳያል፡፡
ለብፁዕ ወቅዱስ አባታችን ዕድሜ እና ጤንነትን እመኛለሁ በዚህ ታላቅ ሕዝብ መካከል በመገኘቴ የተሰማኝን ደስታ እየገለፅኩኝ ንግግሬን አቆማለሁ አመሰግናለሁ፡፡ እግዚአብሔር ይባርካችሁ ብለዋል ከዚህ በመቀጠልም የአዲስ አበባ ከተማ መስተዳደር ከንቲባን በመወከል ከበዓሉ ላይ የተገኙት ክቡር አቶ ኤፍሬም ግዛው የሠራተኛና ማህበራዊ ጉዳይ ኃላፊ የሚከተለውን ንግግር አድርገዋል፡፡
ቅዱስ አባታችን የተከበራችሁ የሃይማኖት መሪዎች፣ በዚህ በዓል ላይ የተገኛችሁ የክብር እንግዶች እንኳን ለዚህ ታላቅ በዓል አደረሳችሁ በህገ መንግሥታችን እንደተደነገገው በአሁኑ ወቅት ሁሉም ሃይማኖቶች እኩል መብት አላቸው የኢትዮጵያ ሕዝብ ለሁሉም ሃይማኖቶች ክብር በመስጠት ተከባብሮ እና ተቻችሎ እንደሚኖር እናውቃለን፡፡ ይሁን እንጂ ከቅርብ ጊዜ ወዲህ በአንድ አንዳን ቦታዎች ጽንፈኝነት እና አክራሪነት የዓለም ተምሳሌት የሆነውን የመከባበር ባህላችንን በመጋፋት የሚአሳዩት ጉዳይ ይታያል፡፡
ሆኖም ሕዝባችን በመቻቻልና በመከባበር ጉዳዩንም በጥንቃቄ በመያዝ በሰላም እንዲፈታ ከፍተኛ ጥረት ሲአደረግ ቆይቷል፡፡ በዚህም የሃይማኖት አባቶች ለዘመናት የነበረውን ተቻችሎ የመኖር ባህል እንዲቀጥል ለማድረግ የራሳቸውን ሚና እና ድርሻ ሲወጡ ቆይተዋል፡፡ አሁን በሀገራችን ከፍተኛ የልማት እድገት እያሳየን ባለንበት ሁኔታ ሰላማችንን ለማደፍረስ የሚሞክሩትን የለውጥ አደናቃፊዎችን በመከላከል የጀመርነውን የልማት ዕድገት ጠንክረን እንድንወጣ ጥሪአችንን እያስተላለፍን በዓሉ የደመቀ እንዲሆን እንመኛለን፡፡ አመሰግናለሁ ብለዋል በመጨረሻም ብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት የሚከተለውን አባታዊ መመሪያና ትምህርታዊ መልእከት አስተላልፈዋል፡፡
መጥምቀ መለኮት ቅዱስ ዮሐንስ መንግሥተ ሰማያት ልትሰጥ ቀርባለችና ንስሐ ግቡ እያለ መጣ፡፡ መንግሥተ ሰማያት የምትወረሰው በእምነት ስለሆነ ንስሐ ግቡ አለ፡፡ የእግዚአብሔርንም መንገድ ጥረጉ ጐባጣው ይቅና፣ ተራራው ዝቅ ይበል ጐድጓዳው ይሙላ እያለ ሰበከ፡፡
በድሮ ዘመን መኪናም ሆነ አይሮፕላን አልነበረም ነገሥታቱ መኳንቱ የሚጓዙት በፈረስ እና በበቅሎ ነበር፡፡ በዚሁ ምክንያት አባጣ ጐርባጣውን መሬት በቁፋሮ እንዲስተካከል ከነገሥታቱ ትእዛዝ ይተላለፍ ነበር፡፡ ዮሐንስም የተናገረው ይህንኑ ነበር አባጣ ጐርባጣው ይስተካከል ሲባል ልባችሁን አንፁ ማለት ነው፡፡ የልባችንን አበባ ጐርባጣ እንድናስተካክል ነው መጥምቁ ዮሐንስ የተናገረው በኃጢአት የተበላሸውን ልባችንን ልናነፃ ይገባናል በሃይማኖት መንግሥተ ሰማያትን መውረስ እንችላለን የልባችንን መንገድ ለእግዚአብሔር ልናስተካክልለት ይገባናል፡፡ እግዚአብሔር ወደ ልባችን እንዲገባልን ተንኮልና ክፋትን ልናስወግድ ይገባናል፡፡ መንፈስ ቅዱስ ወደልባችን እንዲገባ የልባችንን መንገድ እናስተካክል ሰው ሁሉ በእግዚአብሔር ዘንድ እኩል ነው በአርአያ ሥላሴ ተፈጥሮአልና፡፡
ልባችን መራራቅ የለበትም ሰው ድሀ ሀብታም እየተባባለ ሊራራቅ አይገባም ተራራው ዝቅ ይበል የተባለውም ይህንን ነው ጌታችን እና መድኃኒታችን ኢየሱስ ክርስቶስ ከእመቤታችን ክቅድስት ድንግል ማርያም ተወልዶ በዚህ ዓለም ተመላልሷል፡፡ የመንግሥተ ሰማይንም ወንጌል ኢየሱስ ክርስቶስ ባስተማረው የወንጌል ቃል በራስህ ሊደረግብህ የማትወደውን ነገር በሌላው ላይ አታድርግ ብሏል፡፡ እኛ እንድንጨቆን፣ እንድንራብ፣ እንድንጠማ፣ እንድንታረዝ፣ የማንፈልግ ከሆነ ለወንድሞቻችን ለእህቶቻችን ልናስብላቸው ይገባናል፡፡ በኃጢአት እና በጣኦት የተበላሸውን ልባችንን ልናነፃው ያስፈልጋል በዛሬው ዕለት ጌታ በዮሐንስ እጅ የተጠመቀው የአምስት ሺህ አምስት መቶ ዓመት በደላችንን ሊአስወግድልን ነው እንጂ እርሱ በደል፣ ነውር ኑሮበት አይደለም፡፡ በኃጢአት ምክንያት ሰው ከእግዚአብሔር ተለይቶ እንዲኖር እና መርገመ ሥጋ መርገመ ነፍስ ታውጆበት ነበር፡፡ አሁን ግን ያ መርገም ተወግዷል ስለዚህ ሰውነታችንን ልናስተካክል ይገባናል፡፡
በሀገራችን የሚካሄደው ልማት እና ብልፅግና ግቡን እንዲመታ ሁሉም የበኩሉን አስተዋፅኦ ማድረግ አለበት፡፡ የሀገር ልማት የወገን ልማት ነው በሀገራችን ሰላምና ፍቅር እንዲሰፍን ልናደርግ ይገባናል የሰፈነውን ሰላምና ፍቅር እንዲሰፍን ልናደርግ ይገባናል፡፡ የሰፈነውን ሰላምና ፍቅር ለማወክ የሚነሳሱት ሁሉ ሰላማችንን እና ጸጥታችንን ለማደፍረስ የሚሞክሩ መቆጠብ አለባቸው፡፡ ለሀገር የሚጠቅመው ሰላም፣ ህብረት ብልፅግና ነው፡፡ ይህ እንዲጸና ነቅተን እና ተግተን መጠበቅ አለብን የቤተ ክርስቲያን መልእክት ይህ ነው፡፡ ይህንን መልእክት ሁሉም እንዲአስተላልፈው ያስፈልጋል፡፡
ሁሉም መተባበር አለበት ሁከት ፈጽሞ መኖር የለበትም፡፡ በዓሉ የሰላም፣ የፍቅር እና የብልፅግና በዓል ይሁንላችሁ እግዚብሔር ይባርካችሁ በማለት ቅዱስነታቸው የጥምቀተ ባህሩን የጧት መርሐ ግብር በጸሎትና በቡራኬ አጠናቅቀዋል፡፡

 
ዓመታዊው የዓጋዓዝተ ዓለም ሥላሴ ክብረ በዓል በድምቀት ተከበረ

                  እንኳን ለአብርሃሙ ሥላሴ ዓመታዊ ክብረ በዓል በሰላም በጤና በሕይወት አደረሳችሁ፡፡

5.5

‹‹እመ እግዚአብሔር ኢሐነፀ ቤተ ከንቶ ይፃምው እለ የሃንፁ›› ‹‹እግዚአብሔር ቤትን ካልሠራ ግንበኞቹ በከንቱ ይደክማሉ›› መዝ 126፡1 ይህን የታላቁን ነቢይ ቃል ለመነሻነት የተመረጠው ዛሬ በቤተ ክርስቲያናችን የሚከበረው የአጋዕዝተ ዓለም ሥላሴ በዓለ ንግሥን ምክንያት ለመግለፅ ነው፡፡ ታላቁ ነቢይ ቅዱስ ዳዊት ምንም እንኳ ይህን ኃይለ ቃል ከጊዜ በኋላ የፃፈው ቢሆንም የዚህን ጽሑፍ ሐሳብ የሚያንፀባርቀው ቀደም ሲል በዘመነ ህገ ልቡና የተፈፀመ ነበረ በዘፍ1ዐ፡32 ላይ ‹‹የኖኀ የልጆቹ ነገዶች እንደየ ትውልዳቸው በየህዝባቸው እነዚህ ናቸው፤ አህዛብም ከጥፋት ውኃ በኋላ በምድር ላይ ከነዚህ ተከፋፈሉ››፡፡ ይልና በተለይ በዘፍ 11፡1 ጀምሮ ያለውን ስንመለከት ደግሞ ‹‹ምድርም ሁሉ በአንድ ቋንቋ ንግግር ነበረች›› ብሎ የሰናኦርን ግንብ መገንባትና መፍረስን ያትታል፡፡ በአጭሩ የዚህ ኃይለ ቃል ጭብጥ ሐሳብ፡- የሰው ልጆች እግዚአብሔርን ለመቃወም ሲሉ ታላቅ ግንብ እንደገነቡና እግዚአብሔር ደግሞ ይህን ታላቅ ግንብ እንደ አፈራረሰባቸው ነው የሚያብራራው፡፡ ይህን ግንብ ለመገንባት 43 ዓመት ፈጅቶባቸዋል፡፡
ይህ ግንብ በአሁኑ ዘመን በነዱባይ ከተገነቡት ታላላቅ ሰማይ ጠቀስ ህንፃዎች እንደሚበልጥ የቤተ ክርስቲያኒቱ መምህራን ይናገራሉ፡፡ ይህንን ህንፃ ሲገነቡ የነበሩ ሰዎች ቀደም ሲል እንደተገለፀው ለትምክህትና እግዚአብሔርን ለመቃወም ስለሆነ እግዚአብሔር ደግሞ ትምክህትንና ራሱ እግዚአብሔርን የሚቃወም ሰው አይወድም ዘዳግ 5÷ 10 አስመ አነ አምላክ ቀናኢ እኔ እግዚአብሔር ቀናተኛ አምላክ ነኝ ሲል በሙሴ አፍ እንዳስተማረ የሚቃወሙትን የቃወማቸዋል ፡፡
እግዚአብሔር በአምላክነቱ ቀናኢ ነው፡፡ ስለዚህ እንደነዚህ ዓይነት ሰዎች የሚሠሩት ሥራ (ህንፃ) ስኬታማ አይሆንምና ብትንትኑ ወጣ፤ ፈራረሰ፡፡ መ/ቅዱሱ እንደ ነገረን አንድ የነበረ የሰዎች ቋንቋ በሰዎቹ ቁጥር ልክ ሆነ፡፡ ይህም የኃጢአት ውጤት ነው፡፡ አዳም ከመበደሉ በፊት ሰው ከእንስሳትና አራዊት ከጠቅላላ ፍጥረታት ሁሉ በቋንቋ ይግባባ እንደ ነበረ አበው ያስተምራሉ አዳም ሐጢአት ከሠራ በኋላ ግን ከፍጥረታት ጋር መግባባት ተሳነው፡፡ አሁን ደግሞ በነዚህ ኃጢአት ምክንያት ሰውና ሰው መግባባት አቃታቸው፡፡ ሰው ኃጢአት ሲሰራ ከራሱ ከልቡናው ጋር ይጣላል፤ መግባባት ያቅተዋል፡፡ ሰዎች የሚሠሯአቸው ሥራዎች በስኬት እንዲጠናቀቁ ካስፈለገ እግዚአብሔር እንዲጨመርበት ማድረግ ነው፤ እግዚአብሔር ካልተጨመረበት ግን ነቢዩ እንደነገረን ልፋቱ ከንቱ ድካም ነው የሚሆነው፡፡ ይህ ታሪክ በዘመነ ህገ ልቡና የተፈፀመ ሲሆን ሌላ ተጨማሪም ቤተክርስቲያናችን ከዚሁ ጋር አብራ የምታከብረው ታላቁ የሐዲሱ ኪዳን የልደት በዓል ነው፡፡ ሐዋሪያው ቅዱስ ዮሐንስ በ1 ዮሐ 3÷8 ‹‹በእንተ ዝንቱ አስተርአየ ወልደ እግዚአብሔር ከመ ይሥዓር ግብሮ ለጋኔን›› ‹‹ስለዚህ የዲያብሎስን ሥራ ያፈርስ ዘንድ የእግዚአብሔር ልጅ ተገለጠ›› ብሎ እንደ ነገረን የእግዚአብሔር ልጅ ዲያብሎስ ለ55ዐዐ ዘመን የገነባው የሐጢአትን ግንብ ለማፍረስ ሰው የሆነበት ወቅት ነው፡፡ ይህ ወቅት ሠራዊተ ዲያብሎስ ያዘኑበት የተዋረዱበት ሲሆን የሰው ልጆችና መላእክት ደግሞ ያመሰገኑበትና የዘመሩበት ጊዜ (ወቅት) ነው፡፡ ታላቁ ሊቀ ቅዱስ ቄርሎስ ‹‹ዮም አሐደ መርኤተ ኮኑ መላእክት ወሰብእ ከመይሰብሕዎ ለክርስቶስ በቃለ አሚን›› ‹‹እነሆ ዛሬ መላእክትና ሰዎች በእምነት ቃል ኢየሱስ ክርስቶስን ለማመስገን አንድ መንጋ ወይም አንድ ማኀበር ሆኑ›› ሲል ይገልፀዋል ታላቁ የኢትዮጵያውያን መመኪያ የሆነ ሊቁ ቅዱስ ያሬድም በጣዕመ ዜማ ይህን ያብራራዋል፡፡
ይህ የሚያመለክተው ሰዎች ለ55ዐዐ ዘመን በዲያብሎስ ሥር ተገዝተው(በዲያብሎስ ግዛት )ስለነበሩ በዚሁ በጌታ ልደት ከዚህ አስቀያሚ ከሆነው የዲያብሎስ ግዛት ነፃ መውጣታቸውን ያረጋገጡበት ቀን ስለሆነ ለአምላካቸው፣ ለመድኃኒታቸው ታላቅ ምስጋናን አቅርበዋል፡፡ መላእክትም ደግሞ በሰው ሞት አዝነውና ተክዘው ነበር አሁን ግን ሰው ድህነተ፤ ሥጋ ድህነተ ነፍስን ስላገኘ ደስ ብሏቸው አመስግነዋል ዘምረዋል፡፡ መላእክት ሰዎች በሥጋቸውም ይሁን በነፍሳቸው እንዳይጎዱ ወደ ፈጣሪ የሚለምኑ፣ የሚማፀኑ ናቸው፡፡ በዘካ 1፡12 ‹‹የእግዚአብሔርም መልአክ መልሶ አቤቱ የሠራዊት ጌታ ሆይ እነዚህን ሰባ ዓመት የተቆጣሃቸው ኢየሩሳሌምንና የይሁዳን ከተሞች የማትምራቸው እስከ መቼ ነው›› አለ ይላል ይህ የመላእክትን ምልጃ የሚያመላክት ነው፡፡ ስለዚህ መላእክት ለሰው ድህንነት በየጊዜው ይፀልያሉ፤ ይማልዳሉ፡፡ ሰው ሲድን ደግሞ ደስ ብሏቸው ይዘምራሉ ያመሰግናሉ ይህን ቅዱስ ሉቃስ በወንጌሉ በሉቃ2÷12 ድንገትም የሰማይ ሠራዊት ከመልአኩ ጋራ ነበሩ እግዚአብሔርንም እያመሰገኑ ክብር ለእግዚአብሔር በአርያም ይሁን ፤ሰላምም በምድር ለስውም በጎ ፈቃድ ወይም እርቅ ተጀመረ አሉ ሲል የመዘገበልን ፡፡ አሁን ታላቁ ኢትዮጵያዊ ሊቁ ቅዱስ ያሬድ በዝማሬው ‹‹ዮም መላእክት ይየብቡ ወሊቃነ መላእክት ይዜምሩ ኃይላት ይየብቡ እስመ መድኀን መጽአ ውስተ ዓለም ለቢሶ ሥጋነ›› ‹እነሆ መላእክት ሊቃነ መላእክት ለአምላካቸው ለፈጣሪያቸው፣ ምስጋናን ያቀርባሉ ምክንያቱም ኢየሱስ ክርስቶስ መድኃኒት ለመሆን የሰውን ሥጋ ለብሶ ወደ ዓለም መጥቷልና በተጨማሪም ለኛ ስለ ተወለደልን ሥልጣን ያላቸው መላእክት ይቀድሱታል፤ ሱራፌልም እግዚአብሔርን ይባርካሉ፤ ኪሩቤልም ውዳሴን ያቀርባሉ፤ ዛሬ ከኛ የጥንቱ መርገም ተወግዷል፤ ዛሬ ሐጢአታችን ተተወልን ወዘተ….. በማለት ያመሰገኑትን ምስጋና ይቀጥላል፡፡ በነዚህ ሁለቱ ታሪኮች ተመሳሳይ የሆኑ ድርጊቶችን እግዚአብሔር አከናውኗል፡፡
1. ሰው የገነባው ግንብን ማፍረስ ነው፡፡ እግዚአብሔር ለሰው ልጆች አእምሮን የሰጣቸው መልካም ነገርን እንዲሰሩበትና መልካም ነገርን እንዲያስቡበት እንጂ ለመጥፎ አልነበረም እነሱ ግን ይህንን አእምሮ ለመጥፎ ነገር ያውሉታል ሰዎች በአእምሮአቸው መጥፎ ሥራ ቢሰሩ የሚጎዱ ራሳቸው ፤ጥሩ ሥራ ቢሠሩ የሚጠቀሙ ራሳቸው ነቸው፡፡
2. ዲያብሎስ ለ55ዐዐ ዘመን የገነባውን የኃጢአት ግንብን ማፍረስ ነው፡፡ ከነዚህ ከሁለቱ ታሪኮች የምንማረው ፡-
1. የሰው ልጅ ያለ እግዚአብሔር ፈቃድ ምንም፣ ምንም ነገር መሥራት እንደማይችል ነው ሰው ግንብን ቢገነባ፣ መኪና ቢገዛ፣ ቢነግድ ያለ እግዚአብሔር ፈቃድ ሊሆን እንደማይችል መገንዘብ አስፈላጊ ነው፡፡
2. አምላካችን ኢየሱስ ክርስቶስ ዲያብሎስ ለ55ዐዐ ዘመን በብዙ ውጣውረድ የገነባውን የኃጢአት ግንብ በልደቱ (ሰው ሆኖ) ንዶታል፡፡ ነገር ግን ይህ የተናደውን ግንብ እንደገና ኃጢአትን በመስራት እንዳንገነባው ወይም እንዳንጠግነው ጥንቃቄ ያስፈልጋል፡፡ ዲያብሎስ ይህንን የፈረሰውን የኃጢአት ግንብ ለማስጠገን እየወጣና እየወረደ ነው ያለው ሊቀ ሐዋርያት ቅዱስ ጴጥሮስ በ1ኛ መልእክቱ 5÷8 በመጠን ነሩ ነቁም ባላጋራችሁ ዲያብሎስ የሚውጠውን ፈልጎ እንደሚያገሣ አንበሳ ይዞራልና ሲል የሚገልፀው፡፡ ስለዚህ በጥንቃቄ እንድንኖር እጅግ አስፈላጊ ነው ይህንንም እንድናደርግ አምላካችን እግዚአብሔር ይርዳን፡፡ይትባረክ እግዚአብሔር አምላከ እስራኤል ዘተሰሃለነ ወገብረ መድኃኒተ ለሕዝበ ዚአሁ፡፡ ስለዚህ በዓለ ቅድስት ሥላሴ ጥር 7 ቀን ምን ተደረገ? ከጥፋት ውሃ በኋላ የኖኅ ልጆች ወልደው ተዋልደው ብዙዎች ሆኑ ባቢሎን የነበሩት በሰናዖር ምድር ሰፊ ሜዳ አግኝተው ሳንሞት ስም ማስጠሪያ ግንብ እንገንባ ብለው መክረው ታላቅ ግንብ ገነቡ፡፡ አለቃቸውም ናምሩድ ይባላል፡፡ ሞትን የሚያመጡብን ሥላሴ ናቸው እነርሱን ወግተን ሞትን እናርቅ አላቸው፡፡ እነርሱም ከግንቡ ላይ ሆነው ጦር እየሰበቁ ይወረውሩ ጀመር፡፡ ሰይጣን በደመና በምትሀት ጦሩን ደም እየቀባ ይልክላቸዋል እነርሱም ደሙን እያዩ አሁን አብን ወጋነው አሁን ወልድን ወጋነው ይሉ ጀመር፡፡ ሥላሴ ምንም እንኳን ምህረታቸው የበዛ ቢሆንም ባቢሎናዊያን ዲያቢሎስ ስለሰለጠነባቸው ቋንቋቸውን ለያዩባቸው ከዚያም ውሃ ሲለው ጭቃ፣ ጭቃ ሲለው ደንጊያ የሚያቀብለው ሆነ፡፡ እንዲህ የማይግባቡ ቢሆኑ ተበታትነዋል፡፡ ባለማስተዋል የሰሩትም ሕንፃ ነፋስ ጠራርጎ አጥፍቶታል፡፡ ዘፍ.11 1-9 በዘመነ አብርሃምም የሰዶምና የገሞራ ሰዎች ወንድ ለወንድ እስከ መጋባት ድረስ ኃጢአት ሰሩ እግዚአብሔርንም በደሉ፡፡ የአብርሃም የወንድም ልጅ ሎጥ በዚያ ይኖር ነበር፡፡ ሊያድኑት ቢሹ ሁለቱን መላእክት ልከው እግዚአብሔር ሰዶምና ገሞራን አጠፋለሁ ብሏልና ሚስትህንና ልጆችህን ይዘህ ወደ ዞዓር ሂድ ስትሄድም ወደ ኋላ ዞረህ አትመልከት አሉት፡፡ ሎጥም ማልዶ ተነስቶ ሚስቱንና ልጆቹን ይዞ ከከተማ ወጣ፡፡
ሰዶምና ገሞራም ባህረ እሳት ሆኑ፡፡ የሎጥም ሚስት ወይኔ ሀገሬ ብላ መለስ ብትል የጨው ሀውልት ሆና ቀርታለች፡፡ ዘፍ.19 1-29 ይህ የተደረገው በወርኀ የካቲት እንደሆነ አባቶች ይናገራሉ፡፡ፍሬ ነገሩ ግን ይህን ያደረጉት ቅድስት ሥላሴ እንደመሆናቸው በዚህ ዕለት ይዘከራል ሁል ጊዜ በየዓመቱ በድምቀት ይከበራል ፡፡
በመሆኑም የዘንድሮው ዓመትም እንደተለመደው በአዲስ አበባ ሀገረ ስብከት በታላቁ ካቴደራል በመንበረ ጸባዖት ቅድስት ሥላሴ ካቴድራል በድምቀት ተከብሯል፡፡በበዓሉ ላይ ብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ  ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት፤ ብፁዕ አቡነ ናትናኤል የአርሲ ሀገረ ስብከት ሊቀ ጳጳስ ፤በፁዕ አቡነ አረጋዊ የመንበረ ጸባዖት ቅድሰት ሥላሴ ካቴድራል የበላይ ኃላፊ ፤ብፁዕ አቡነ እስጢፋኖስ በአዲስ አበባ ሀገረ ስብከት የብፁዕ ወቅዱስ ፓትርያርክ ረዳት እና የጅማ ሀገረ ስብከት ሊቀ ጳጳስ፤ክቡር ሊቀ አእላፍ ቀሲስ በላይ መኮንን የአዲስ አበባ ሀገረ ስብከት ስብከቱ ዋና ሥራ አስኪያጅ፤ የካቴድራሉ ዋና አስተዳዳሪ ክቡር ቆሞስ አባ ኪሮስ ፀጋዬ፤የካትድራሉ ሰበካጉባኤ አባላትና መላው ማህበረ ካህናት እንዲሁም በብዙ ሺህ የሚቆጠር ሕዝበ ክርስቲያን በበዓሉ ላይ ተገኝተው በዓሉን በድምቀት አክብረዋል፡፡

 
ዝርዝር ፅሁፍ...
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 9 ከ 21

የቤተክርስቲያን አድራሻ

የካቴድራሉ ሰበካ ጉባዔ ጽ/ቤት
ስልክ ፤ 011-1-23-35-18 / 011-1-23-35-15
አዲስ አበባ
ኢትዮጵያ
church@trinity.eotc.org.et
www.trinity.eotc.org.et

ግጻዌ

ማስታወቂያ

ለመንበረ ጸባዖት ቅድስት ሥላሴ ካቴድራል እድሳት የበኩልዎን አስታዋጽዖ ያድርጉ!

መርዳት የምትፈልጉ ምዕመናን ሁሉ የሚከተለውን አድራሻ መጠቀም ትችላላችሁ፡፡

አራት ኪሎ ቅርንጫፍ, ቁጥር= 0171859072600/2637 (መንበረ ጸባዖት ቅድስት ሥላሴ ካቴድራል እድሳት )

ብላች መላክ ትችላላችሁ፡፡